आई अंबाबाई का करते नगरप्रदक्षिणा? अलौकिक सोहळ्यामागं आहे मोठी परंपरा, Video

दरवर्षीप्रमाणे जागरादिवशी फुलांनी सजवलेल्या शार्दुल वाहनावर श्री अंबाबाईची उत्सवमूर्ती ठेवण्यात येत असते. दुपारनंतर महाद्वार रोड, गुजरी, भवानी मंडप, मिरजकर तिकटी आदी प्रदक्षिणा मार्ग परिसर वाहतुकीसाठी बंदच केला जातो. या मार्गावर काही ठिकाणी फुलांच्या पायघड्या अंथरण्यात येत असतात. तर ठिकठिकाणी अनेक हौशी कलाकारांसह भाविक आकर्षक रांगोळ्या रेखाटत असतात.

तोफेच्या सलामीनंतर महाद्वारातून पालखी नगरप्रदक्षिणेसाठी बाहेर पडते. मार्गावर बऱ्याच ठिकाणी आकर्षक विद्युत रोषणाई आणि प्रकाशझोताने मार्ग उजळून निघतो. अंबाबाईचे दर्शन घेण्यासाठी मार्गावर दुतर्फा मोठी गर्दी असते. देवी आपल्या वाहनातून महाद्वार रोडवरुन गुजरी, भाऊसिंगजी रोडमार्गे भवानी मंडपात येते. यावेळी मार्गावर विविध संस्था तसेच भाविकांच्यावतीने ठिकठिकाणी प्रसादाचे आयोजन केले होते. गुजरी येथे अंबाबाईची भव्य प्रतिकृती साकारकण्यात आली होती. भवानी मंडपातून नंतर मिरजकर तिकटीमार्गे बिनखांबी गणेश मंदिर, महाद्वार रोडवरून पुन्हा महाद्वार चौकात पालखी येत असते. नगर प्रदक्षिणा सोहळ्यामुळे रात्री उशिरापर्यंत मंदिर परिसरात भाविकांची मोठी गर्दी होत असते, अशी माहिती मंदिर अभ्यासक प्रसन्न मालेकर यांनी दिली आहे.

दरम्यान, यंदाही मोठ्या जल्लोषी आणि भक्तिमय वातावरणात अंबाबाई देवीचा हा अलौकिक सोहळा पार पडला. हजारो नयनांनी हा अप्रतिम क्षण आपल्या डोळ्यात साठवत देवीचे दर्शन घेतले आणि पुन्हा पुढच्या वर्षीच्या या क्षणाची वाट पाहू लागले.