आई राजा उदो उदो..! तुळजाभवानी देवीच्या मंचकी निद्रेला प्रारंभ, नवरात्र उत्सवापूर्वीची प्रथा काय?

धाराशिव: श्री तुळजाभवानी मातेच्या शारदीय नवरात्र महोत्सवाला लवकरच सुरुवात होणार आहे. त्यापूर्वीच्या देवीच्या मंचकी निद्रेस मंगळवारी सायंकाळी प्रारंभ झाला. 9 दिवसांची मंचकी निद्रा घेऊन 3 ऑक्टोबरच्या पहाटे कुलस्वामिनी श्री तुळजाभवानी माता सिंहासनावर विराजमान होणार आहे. त्याच दिवशी दुपारी 12 वाजता घटस्थापनेने शारदीय नवरात्र महोत्सवाला सुरुवात होणार आहे, अशी माहिती मंदिरातील पुजारी अमरराजे कदम यांनी दिली.

धाराशिव जिल्ह्यातील तुळजापूर येथील श्री तुळजाभवानी मंदिर हे साडेतीन शक्तीपीठांपैकी एक आहे. महाराष्ट्राची कुलस्वामिनी म्हणून तुळजाभवानी देवीला ओळखलं जातं. याठिकाणी संपूर्ण जगभरातून भाविक दर्शनासाठी येत असतात. नवरात्रीत तुळजापूर येथे मोठा उत्सव असतो. त्यामुळे या काळात भाविकांची मोठी गर्दी याठिकाणी असते.