दख्खनचा राजा जोतिबाचं दर्शन पुन्हा सुरू, मंदिरात भाविकांच्या रांगा, पण का होतं बंद?

जोतिबा मंदिरातील मुख्य मूर्तिवर रासायनिक संवर्धनाची प्रक्रिया करण्यासाठी मंगळवारपासून 4 दिवस श्रींचे दर्शन बंद ठेवण्यात आले होते. आज ही प्रक्रिया पूर्ण झाली. त्यानंतर आज सकाळी 7 वाजून 5 मिनिटांनी जोतिबा देवाच्या मूर्तीची विधीवत प्राण प्रतिष्ठापना करण्यात आली. यावेळी प्रमुख अतिथी म्हणून श्रीक्षेत्र आडी देवस्थानचे परमात्मराज महाराज आणि प्रमुख उपस्थित म्हणून जिल्हाधिकारी अमोल येडगे, देवस्थान समितीचे सचिव शिवराज नायकवडे उपस्थित होते. मूर्तीची प्राणप्रतिष्ठा झाल्यानंतर मंदिर भाविकांना दर्शनासाठी खुले करण्यात आले.

यावेळी आरती, मंत्रपठन, पुष्पवृष्टी करून शंख, घंटानाद करण्यात आला. चांगभलंचा गजर करून फटाक्यांची आतिषबाजी करण्यात आली. मूळ मूर्तीचे दर्शन चार दिवस बंद ठेवल्याने आज दर्शनासाठी भाविकांनी मंदिरात मोठी गर्दी केली. भाविकांना महाप्रसाद वाटप करण्यात आला. मंदिरात महिलांनी सामुहिक मंत्रपठन केले. मंदिराच्या सभोवती रांगोळी काढण्यात आली होती. त्यांचबरोबर मंडपाची आकर्षक सजावट देखील करण्यात आली होती.