Navratra 2025: शारदीय नवरात्री नेमकी कधी आहे? अचूक तिथी, शुभ मुहूर्त आणि धार्मिक महत्त्व

घटस्थापनेचा मुहूर्त 22 सप्टेंबर रोजी सकाळी 06:09 ते 08:06 पर्यंत आहे.

वाईटावर चांगल्याचा विजय म्हणून नवरात्र साजरे केले जाते. नवरात्र साजरं करण्यासंदर्भातील एका प्रचलित पौराणिक कथेनुसार महिषासुर राक्षसाला ब्रह्मदेवाकडून अमरत्वाचे वरदान मिळाले होते. त्याचा मृत्यू कोणत्याही मनुष्याच्या, राक्षसाच्या किंवा देवाच्या हातून होणार नव्हता. त्याला फक्त एका महिलेच्या हातूनच मृत्यू येणार होता. हे वरदान मिळाल्यानंतर महिषासुराने मानव आणि देवतांना त्रास देण्यास सुरुवात केली. महिषासुराच्या त्रासामुळे वैतागलेले सर्व देव त्रिदेवांजवळ गेले. ब्रह्मा, विष्णू आणि महेश या तीन देवांनी आदिशक्तीला आवाहन केले. मग महिषासुराचा अंत करण्यासाठी, दुर्गा माता प्रकट झाली, त्यामुळे तिला महिषासुरमर्दिनी म्हणतात. देवतांकडून शक्ती मिळाल्यानंतर माता दुर्गाने महिषासुराला युद्धासाठी आव्हान दिले. दोघांदरम्यान नऊ दिवस युद्ध झाले आणि दहाव्या दिवशी देवी दुर्गाने महिषासूरचा वध केला. याची आठवण म्हणून नवरात्र उत्सव साजरा केला जातो.

नवरात्राच्या प्रत्येक दिवसाला एका विशिष्ट रंगाचं महत्त्व असतं आणि लोक सहसा त्याच रंगाचे कपडे त्या दिवशी घालतात. इतकंच नाही, तर नवरात्र सजावटीची थीमही प्रत्येक दिवशीच्या रंगाप्रमाणे वेगवेगळ्या रंगांमध्ये केली जाते. सर्व सजावट आणि रोषणाई संबंधित दिवसाचा जो रंग असेल, त्याप्रमाणे केली जाते. पिवळा, मोरपंखी, राखाडी, नारंगी, पांढरा, लाल, निळा, गुलाबी आणि जांभळा हे प्रमुख नऊ रंग आहेत.

नवरात्रीचा उपवास 9 दिवस ठेवला जातो ज्यामध्ये देवीच्या नऊ वेगवेगळ्या रूपांची पूजा करण्याचा नियम आहे. नऊ दिवस देवीच्या नऊ रुपांची मनोभावे पूजा केल्यास चांगले फळ मिळते, असं मानलं जातं.