'हा निर्णय चुकीचा…' 33 रन्सने गुजरातचा पराभव, शुभमन गिलने दिला नवा बहाणा; सामन्यानंतर असं काय म्हणाला?

लखनौविरुद्धच्या पराभवानंतर शुभमन गिल निश्चितच निराश झाला होता , परंतु प्रथम गोलंदाजी करण्याच्या त्याच्या निर्णयाबद्दल तो म्हणाला की हा निर्णय चुकीचा नव्हता. शुभमन गिल म्हणाला, 'आम्ही गोलंदाजीत 15-20 अतिरिक्त धावा दिल्या. आम्हाला ते 215-220 धावा करतील अशी अपेक्षा होती. प्रथम गोलंदाजी करण्याचा निर्णय चुकीचा नव्हता आणि आम्ही पॉवरप्लेमध्ये चांगली गोलंदाजी केली. या सामन्यात शाहरुख आणि रदरफोर्डने ज्या पद्धतीने फलंदाजी केली ती आमच्यासाठी सकारात्मक होती. पुढच्या सामन्यात आम्ही पुन्हा तो मोमेंटम मिळवण्याचा प्रयत्न करू.

गुजरातविरुद्धच्या या सामन्यात लखनौच्या संघाने नाणेफेक गमावल्यानंतर प्रथम फलंदाजी करून चांगली सुरुवात केली होती. लखनौसाठी मिचेल मार्श आणि एडेन मार्कराम यांनी पहिल्या विकेटसाठी 91 धावांची भागीदारी केली. 24 चेंडूत 36 धावा काढून मार्कराम बाद झाला असला तरी, मार्शने एकट्याने संघाचा किल्ला सांभाळला आणि 56 चेंडूत त्याचे शतक पूर्ण केले.