या खेळाडूनं भारताच्या युवराजसिंगचं वर्ल्ड रेकॉर्ड मोडीत काढलं आहे. भारताचा माजी ऑल राउंडर खेळाडू युवराजसिंगच्या नावे आंतरराष्ट्रीय टी-20 क्रिकेटमध्ये सर्वात वेगवान अर्धशतक करण्याचा विक्रम होता. युवराजनं 12 बॉलमध्ये अर्धशतक झळकवण्याचा पराक्रम केला होता. मात्र, एशियन गेम्समध्ये नेपाळच्या एका खेळाडूनं केवळ 9 बॉलमध्ये अर्धशतक झळकवून क्रिकेटविश्वात खळबळ उडवून दिली आहे. 'झी न्यूज'नं या बाबत वृत्त प्रसिद्ध केलं आहे.

दीपेंद्र सिंह आयरी असं या खेळाडूचं नाव आहे. त्याने युवराजसिंगचा विक्रम मोडला आहे. दीपेंद्रनं केवळ 9 बॉलमध्ये टी-20 मधील सर्वांत जलद अर्धशतक झळकवलं आहे. यादरम्यान त्यानं 10 बॉलचा सामना करून आठ सिक्सच्या मदतीनं नाबाद 52 रन केल्या. दीपेंद्रनं पहिल्या सहा बॉलमध्ये सहा सिक्स ठोकले. युवराजनं 2007मधील टी-20 वर्ल्ड कपमध्ये इंग्लंडविरुद्ध 12 बॉलमध्ये अर्धशतक केलं होतं. याच मॅचमध्ये युवराजनं स्टुअर्ट ब्रॉडच्या एका ओव्हरमध्ये सहा सिक्स मारले होते.