Shikhar Dhawan चा पाय खोलात, ED ने पाठवली गब्बरला नोटीस! टीम इंडियाचा तिसरा खेळाडू अडचणीत

ऑनलाईन बेटिंग ॲपशी संबंधित एका प्रकरणात सक्तवसुली संचालनालयाने (ED शिखर धवनला (Shikhar Dhawan ED Summons) समन्स पाठवले आहे. 1xBet नावाच्या ऑनलाईन बेटिंग प्लॅटफॉर्मशी संबंधित पैशांच्या गैरव्यवहाराची ईडी चौकशी करत आहे. याच प्रकरणात धवनने सोशल मीडियावर या ॲपचा प्रचार केल्याचा आरोप आहे. त्यामुळे ईडीने धवनला चौकशीत सहभागी होऊन या प्रकरणातील त्याची भूमिका स्पष्ट करण्यास सांगितले आहे.

वृत्तसंस्था पीटीआयने दिलेल्या माहितीनुसार, ईडीच्या चौकशीमध्ये धवनचा या ॲप्ससोबतचा संबंध काही प्रमोशनल ॲक्टिव्हिटीजशी जोडला गेला आहे. ईडी या प्रकरणात मनी लाँड्रिंग प्रतिबंधक कायद्यांतर्गत (PMLA) धवनचा जबाब नोंदवेल. कोट्यवधी रुपयांची फसवणूक आणि मोठ्या प्रमाणावर करचोरी केल्याचा आरोप असलेल्या अनेक अवैध बेटिंग ॲप्सची ईडी चौकशी करत आहे.

गेल्या वर्षापासून अनेक बॉलीवूड, साऊथ फिल्म स्टार्स आणि क्रिकेटपटूंची अशा अवैध बेटिंग ॲप्सचा कथितपणे प्रचार केल्याबद्दल चौकशी सुरू आहे. या यादीत विजय देवरकोंडा, राणा दग्गुबाती, प्रकाश राज, हरभजन सिंग, उर्वशी रौतेला आणि सुरेश रैना यांचा समावेश आहे. गेल्या महिन्यात सुरेश रैनाचीही या प्रकरणात चौकशी करण्यात आली होती. तसेच, गेल्या वर्षी जूनमध्ये सुरेश रैना आणि हरभजन सिंग यांच्यासह अनेक सेलिब्रिटींनी तपास संस्थेसमोर आपले जबाब नोंदवले आहेत.