MI vs GT Eliminator : मुंबई इंडियन्सचं 'Countdown' सुरु! एलिमिनेटर सामना रद्द झाला तर, या संघाची होणार IPL मधून एक्सिट

आयपीएल एलिमिनेटर सामना हा प्लेऑफचा तो टप्पा आहे जिथे तिसऱ्या आणि चौथ्या क्रमांकाचे संघ एकमेकांविरुद्ध भिडतात. या सामन्यातील विजेता संघ क्वालिफायर-2 मध्ये प्रवेश करतो, जिथे त्याला अंतिम फेरीत पोहोचण्याची संधी मिळते. गुजरात टायटन्स आणि मुंबई इंडियन्स, दोघेही या हंगामात शानदार कामगिरी करण्यासाठी येथे आले आहेत. दोन्ही संघांसाठी हा सामना करा किंवा मरो असा असेल. जो हरेल त्याचा प्रवास इथेच संपेल.परंतु बीसीसीआयने या महत्त्वाच्या सामन्यासाठी कोणताही राखीव दिवस ठेवलेला नाही, ज्यामुळे जर पावसामुळे किंवा इतर कोणत्याही कारणामुळे सामना रद्द झाला तर लीग टप्प्यात चौथ्या स्थानावर असलेला संघ हंगामाबाहेर जाईल. लीग टप्प्यात गुजरात तिसऱ्या स्थानावर आहे आणि मुंबई चौथ्या स्थानावर आहे. याचा अर्थ असा की जर सामना रद्द झाला तर मुंबई इंडियन्स आयपीएल 2025 मधून बाहेर पडेल आणि गुजरात टायटन्स क्वालिफायर-2 मध्ये आपले स्थान निश्चित करेल, जिथे त्यांचा सामना क्वालिफायर-1 मधील पराभूत संघाशी होईल.

प्लेऑफमध्ये अंतिम सामन्यासह एकूण 4 सामने खेळवले जातील. यापैकी दोन सामन्यांसाठी राखीव दिवस ठेवण्यात आलेला नाही. हा सामना क्वालिफायर-1 आणि एलिमिनेटर आहे. त्याच वेळी, क्वालिफायर-2 आणि अंतिम सामन्यासाठी राखीव दिवस ठेवण्यात आला आहे. जर हे दोन्ही सामने नियोजित दिवशी पूर्ण झाले नाहीत तर सामना दुसऱ्या दिवशी देखील खेळवला जाईल. राखीव दिवशी, सामना सामन्याच्या दिवशी जिथे संपला होता तिथूनच सुरू होईल.