T20 world Cup च्या फायनलपूर्वी राडा! क्विंटन डी कॉक ICC वर भडकला, एका गोष्टीवरून घातला धिंगाणा

वेस्ट इंडिज आणि दक्षिण आफ्रिकेचे संघ अद्याप कोलकात्यात अडकलेले असताना, इंग्लंडचा संघ त्यांच्या आधी मायदेशी रवाना होत असल्याबद्दल डी कॉकने आश्चर्य व्यक्त केलं. आयसीसीच्या या दुजाभावामुळे डी कॉकने सोशल मीडियावर आपली नाराजी उघड केली. सोशल मीडियावर पोस्ट लिहित त्याने खंत व्यक्त केली अन् आयसीसीवर टीका देखील केली आहे.

क्विंटन डी कॉकने आपल्या इन्स्टाग्राम स्टोरीवर पोस्ट शेअर करत आयसीसीच्या कार्यपद्धतीवर प्रश्नचिन्ह उपस्थित केले. क्विंटन डी कॉकने लिहिले की, "हे खूपच मजेशीर आहे की आयसीसीकडून आम्हाला अद्याप कोणतीही अधिकृत माहिती मिळालेली नाही. मात्र, इंग्लंडचा संघ आमच्या आधी कसा काय मायदेशी निघत आहे? वेस्ट इंडिज आणि साऊथ आफ्रिकेचे खेळाडू अजूनही अंधारात आहेत." क्विंटन डी कॉकच्या या स्टोरीमुळे साऊथ अफ्रिकेचे खेळाडू अडचणीत असल्याचं पहायला मिळतंय.

दरम्यान, जगभरात इस्राईल आणि ईराण यांच्यातील सुरू असलेल्या युद्धामुळे हाहाकार उडवला आहे. या युद्धामुळे हवाई वाहतुकीवर मोठा परिणाम झाला असून अनेक उड्डाणं रद्द करण्यात आली आहे. अशातच आंतरराष्ट्रीय दळणवळणाला ब्रेक जरी लागला असला तरी देखील आयसीसीने खेळाडूंची पर्यायी व्यवस्था करणे गरजेचे आहे. आयसीसीने देखील खेळाडूंना लवकरात लवकर रवाना करण्याचं आश्वासन दिलंय.