दहशतवादी सैफुल्लाहला गोळ्या घालून संपवला, RSS मुख्यालयावर केला होता हल्ला; मोस्ट वॉन्टेड Terroristचा खात्मा

सैफुल्लाह हा लष्करच्या ऑपरेशनल कमांडर आजम चीमा ऊर्फ बाबाजीचा खास आणि विश्वासू सहकारी होता. नेपाळमध्ये तो विनोद कुमार या नावाने कार्यरत होता आणि त्याने नगमा बानू नावाच्या नेपाळी युवतीशी लग्नही केले होते. 2006 मध्ये नागपूरमधील संघ मुख्यालयावर झालेल्या हल्ल्यात त्याची प्रमुख भूमिका होती. याशिवाय रामपुरमधील सीआरपीएफ कॅम्पवरील हल्ल्यातही त्याचा मोठा सहभाग होता. बंगळूरुमधील IISc वरील हल्ल्याच्या कटातही तो सामील होता.

सध्या तो पाकिस्तानच्या सिंध प्रांतातील माटली येथून आपल्या कारवाया करत होता आणि लष्करासाठी सतत नवीन दहशतवाद्यांची भरती करत होता. नेपाळमधून दहशतवादी सदस्यांची भरती करणे, त्यांच्यासाठी निधी (फंडिंग) आणि आवश्यक सामग्री (लॉजिस्टिक्स) पुरवणे, तसेच भारत-नेपाळ सीमेवरून होणाऱ्या हालचालींची जबाबदारी त्याच्यावर होती. त्याचे लष्करचे लॉन्च कमांडर आझम चीमा आणि लेखा प्रमुख याकूब यांच्याशी थेट संबंध होते. सैफुल्लाहच्या मारल्या जाण्याने भारतातील सुरक्षा यंत्रणांनी सुटकेचा श्वास घेतला आहे, कारण तो अनेक वर्षांपासून त्यांच्या रडारवर होता.