'इराण सोडा, आत्ताच्या आत्ताच; दुर्लक्ष केल्यास वाईट होईल', अमेरिका कोणत्याही क्षणी हल्ला करू शकते

या इशाऱ्यामागे मध्यपूर्वेत वाढत चाललेला तणाव कारणीभूत आहे. अमेरिकेने गेल्या 22 वर्षांतील सर्वात मोठी लष्करी तैनाती या प्रदेशात केली असल्याचे सांगितले जात आहे. अमेरिकेचे राष्ट्राध्यक्ष डोनाल्ड ट्रम्प यांनी इस्लामिक रिपब्लिक इराणच्या अणुकार्यक्रमावर लष्करी कारवाई करण्याची धमकी दिली आहे. या पार्श्वभूमीवर संभाव्य संघर्षाची शक्यता व्यक्त होत असून, त्याच अनुषंगाने सर्बियाने आपल्या नागरिकांना ‘जितक्या लवकर शक्य असेल तितक्या लवकर’ इराण सोडण्याचे आवाहन केले आहे.

दरम्यान पोलंडनेही यापूर्वी आपल्या नागरिकांना इराण न जाण्याचा आणि तेथे असलेल्यांनी तातडीने परतण्याचा सल्ला दिला होता. डिसेंबर 2025च्या अखेरीस आणि जानेवारी 2026च्या सुरुवातीला इराणमध्ये मोठ्या प्रमाणावर आंदोलनांची लाट उसळली होती. गुरुवारी पोलंडचे पंतप्रधान डोनाल्ड टस्क यांनी स्पष्ट शब्दांत इशारा देत आपल्या नागरिकांना इराणमध्ये जाऊ नये आणि सध्या तेथे असलेल्यांनी तात्काळ बाहेर पडावे, असे आवाहन केले. त्यांनी सांगितले की सध्याची परिस्थिती लक्षात घेता शस्त्रसज्ज संघर्षाची शक्यता नाकारता येत नाही आणि अशी वेळ आल्यास काही तासांत लोकांना बाहेर काढणे शक्य होणार नाही.

लढाईची शक्यता आहे. काही तासांत किंवा अगदी थोड्याच वेळात नागरिकांना बाहेर काढणे अशक्य होऊ शकते, असा गंभीर इशारा त्यांनी दिला. पोलंड सरकारने इराणमध्ये नेमके किती पोलिश नागरिक आहेत, याबाबत तपशील दिलेला नाही. मात्र पूर्वी अशा इशाऱ्यांकडे दुर्लक्ष केल्याने वाईट अनुभव आले असल्याचे टस्क यांनी नमूद केले.