निळ्या पाण्याची गोष्ट! वीज पडल्याची अफवा अन् Viral Video मागील सत्य

तुळजापूर तालुक्यातील मसला खुर्द येथील ओढ्याच्या पाण्याचा व्हिडिओ राज्यभर व्हायरल झाला होता. यात दिसणारं निळं पाणी हे वीज पडल्यानं आल्याचा दावा करण्यात आला होता. या प्रकाराची सर्वत्र चर्चा झाली. मात्र, याबाबत गावातील सरपंचांनी वास्तव सांगितलं आहे. वीज पडल्याने पाणी निळं झाल्याची अफवा असल्याचं सरपंच रामेश्वर वैद्य यांनी म्हटलंय.

ओढ्यातून वाहणारं निळ्या पाण्याची भूवैज्ञानिक विभागाकडून तपासणी करण्यात आली. यातून धक्कादायक सत्य पुढे आले आहे. हे निळं पाणी आजूबाजूला असणाऱ्या द्राक्ष बागांमुळे आल्याचं स्पष्ट झालंय. द्राक्ष बागेत वापरण्यात आलेल्या रासायनिक औषधांमुळे पाण्याला निळा रंग आला आहे. द्राक्षांवर फवारण्यासाठी लागणारी विविध औषधे वापरून राहिलेली फेकून देण्यात आली होती. त्यानंतर पाऊस झाला आणि ती औषध पाण्यात मिसळली गेली. त्यामुळे हे पाणी निळं झालं असल्याचा प्राथमिक अंदाज भू-वैज्ञानिकांकडून वर्तवण्यात आला आहे.

सोशल मीडियावर व्हायरल होणाऱ्या व्हिडिओची सत्यता पडताळूनच लोकांनी निर्णय घ्यावा. अफवांवर विश्वास ठेवू नये. हे पाणी शरीरास घातक असून ते पुढील काही दिवसांमध्ये झिरपून जाईल, असं भूवैज्ञानिक डॉ. मेघा शिंदे यांनी म्हटलं आहे.