Gatari Amavasya : गटारीला खरंच दारू पिऊन गटारात लोळतात? गटारी म्हणजे नेमकं काय?

असा प्रश्न तुम्ही तुमच्या आजी-आजोबांना, आईवडिलांना किंवा कोणत्याही मोठ्या माणसांना कधी ना कधी विचारला असेल. बहुतेकांनी याचं उत्तर दारू पिऊन लोक गटारात लोळतात म्हणून गटारी असंच दिलं असेल. जुने लोक आजही असंच सांगतात, असाच दावा करतात. तसंच नावाप्रमाणे गटारी म्हटलं की आपल्यासमोरही गटारच येतं आणि या दिवसात बहुतेक लोकांना आपण दारू पिऊन कुठे ना कुठे पडलेलंही पाहतो.

याच अमावस्येला दीप अमावस्याही म्हणतात. या दिवशी दीप पूजनालादेखील विशेष महत्त्व असतं. अंधारात प्रकाश निर्माण करणारा दिवा म्हणजे मांगल्याचं प्रतीक. म्हणूनच हिंदू धर्मात त्याला विशेष महत्त्व आहे. आषाढ, श्रावण हे महिने पावसाचे. त्यामुळे पावसासारखी निर्माण झालेली आपल्या आयुष्यातली काळोखी दूर होऊन श्रावणासारखी समृद्धी नांदावी, या उद्देशानं आषाढ महिन्याचा शेवट दीप पूजनानं केला जातो.