Video: सफारीत 13 वर्षीय मुलावर चित्त्याचा थरारक हल्ला; सुट्टीसाठी गेला, पंज्यात सापडला- सगळं घडलं क्षणात

बायलॉजिकल पार्कचे कार्यकारी संचालक सूर्य सेन यांनी दिलेल्या माहितीनुसार, एक चित्ता अनपेक्षितपणे सफारी गाडीचा पाठलाग करत होता. अचानक तो गाडीवर उडी मारून त्याने मुलाच्या हाताला ओरखडले. या घटनेचा व्हिडिओ सोशल मीडियावर व्हायरल झाला आहे. व्हिडिओमध्ये चित्ता सफारी जीपचा पाठलाग करताना दिसत आहे आणि गाडीच्या खिडकीला जाळ्या असूनही तो आपल्या पंजाने हल्ला करत असल्याचे दिसते. चित्त्याच्या पंजांमुळे मुलाच्या हातावर खोलवर ओरखडे उमटले.

घटनेनंतर पार्क कर्मचाऱ्यांनी तात्काळ मुलाकडे लक्ष दिले आणि त्याला उपचारासाठी जवळच्या एका खाजगी रुग्णालयात नेण्यात आले. प्राथमिक उपचारानंतर मुलाला डिस्चार्ज देण्यात आला असून तो घरी परतला आहे. भविष्यात अशा घटना पुन्हा घडू नयेत यासाठी या घटनेची चौकशी केली जात असल्याचे पार्क प्रशासनाने सांगितले आहे.

बेंगळुरूमध्ये वन्यजीव सफारीसाठी बन्नेरघट्टा प्राणीसंग्रहालय खूप लोकप्रिय आहे. ही घटना अशा वेळी घडली आहे जेव्हा बन्नेरघट्टा राष्ट्रीय उद्यानाच्या (Bannerghatta National Park) परिसरातील अनेक वाद आणि समस्या चर्चेत आहेत.