Mahabharat : दुर्योधनाचा जन्म होताच घाबरले होते लोक, म्हणाले, याला जंगलात फेका

नवी दिल्ली : महाभारतातील व्हिलन म्हणजे दुर्योधन. त्याचा जन्म झाला तेव्हाच लोक घाबरले होते. दुर्योधनाच्या जन्मानंतर अशा काही विचित्र घटना घडल्या, ज्या आधी कधीच घडल्या नाही आणि लोक घाबरले. ज्योतिषांनी त्याची पत्रिका काढली तेव्हा तेसुद्धा घाबरले. त्यांनी हस्तिनापूरचा राजा धृतराष्ट्राला आपल्या या मुलाला जंगलात फेकून देण्यास सांगितलं होतं. दुर्योधनाच्या जन्मावेळी नेमकं असं काय घडलं होतं, यामागे एक वेगळीच कथा आहे.

दुर्योधनाच्या जन्माची स्टोरी म्हणजे गांधारीला शंभर पुत्र होतील असा आशीर्वाद महर्षी व्यासांनी दिला होता. गांधारी गर्भवतीही झाली. पण 2 वर्षे मूल जन्माला आलंच नाही. त्याचवेळी कुंतीने युधिष्ठिरला जन्म दिला. तेव्हा गांधारीने धृतराष्ट्रला न सांगता आपला गर्भपात करवला आणि लोखंडासारखं कडक मांसाचं पिंड निघालं. ती ते फेकून देत होती पण तेव्हा व्यासांनी तिला थांबवलं. त्यांच्या सल्ल्यानुसार तिनं ते मांसाचं पिंड थंड पाण्यात ठेवलं. त्यातून 101 भ्रूण वेगळे झाले. ते वेगवेगळ्या घड्यात ठेवले. एक वर्षानंतर एका घड्यातून दुर्योधनाचा जन्म झाला.

दुर्योधनाच्या जन्मानंतर भयंकर घडलं दुर्योधनचा जन्म होताच तो गाढवासारखा कर्कश आवाजात ओरडू लागला. त्याच वेळी गिधाडं, घुबडं, कोल्हे आणि कावळेदेखील ओरडायला लागले. म्हणजे खूप विचित्र आवाज येऊ लागले. आकाश काळं झालं. अनेक ठिकाणी आग लागली. हे पाहून सगळे घाबरले. धृतराष्ट्र घाबरला.