पाण्याबाहेर मासा तडफडावा तसं आकाशात फडफडलं विमान; 10 सेकंदात गेले 55 जीव

विमानाने टेकऑफ करून फक्त 15 मिनिटं उलटली होती आणि विमान उंचीवर येऊ लागलं होतं. पण त्यानंतर विमानाला तीव्र धक्का बसला. दहा सेकंदांनंतर विमानाला दुसरा धक्का बसला, तो पाण्याबाहेर मासा तडफडावा तसा हवेत तडफडत होता. एअर ट्रॅफिक कंट्रोल रूममधील ग्राउंड स्टाफ आणि विमानतळ कर्मचाऱ्यांच्याही चेहऱ्याचा रंग उडाला.

काही सेकंदांनंतर आकाशात एक मोठा स्फोट झाला. आगीच्या ज्वाळांनी वेढलेल्या विमानाचे दोन तुकडे झाले ते जमिनीकडे वेगाने आले. आधीम एका घरावर आदळले, नंतर पार्कच्या तिकीट बूथवर आदळले आणि थेट नानहाई पार्कच्या बर्फाळ तलावात कोसळले. जळत्या अवशेषांनी जवळच उभ्या असलेल्या नौका देखील व्यापल्या.

अपघातग्रस्त विमानात 46 चिनी नागरिक आणि एक इंडोनेशियन प्रवासी होते. या अपघातात फ्लाइट कॅप्टन वांग पिन (वय 33 वर्षे), को- पायलट यांग गुआंग (वय 37 वर्षे), फर्स्ट ऑफिसर यी चिनवेई (वय 27 वर्षे), दोन फ्लाइट अटेंडंट आणि एक सुरक्षा अधिकारी यांच्यासह सर्व 46 प्रवाशांना आपला जीव गमवावा लागला.

चीनच्या नागरी विमान वाहतूक प्रशासनाने केलेल्या तपासणीत असं दिसून आलं की अपघाताच्या वेळी तापमान गोठणबिंदूपेक्षा कमी होतं, ज्यामुळे विमानाच्या पंखांवर मोठ्या प्रमाणात बर्फ जमा झाला होता. उड्डाण करण्यापूर्वी बर्फ काढला गेला नाही आणि बर्फ काढून टाकण्याची प्रक्रियाही करण्यात आली नाही. उड्डाणानंतर बर्फामुळे विमानाची उंची कमी झाली आणि ते हवेत राहू शकलं नाही. परिणामी विमान अवघ्या दहा सेकंदात जमिनीवर कोसळलं. 2006 मध्ये पूर्ण झालेल्या चौकशीनंतर चायना ईस्टर्न एअरलाइन्सचे 12 कर्मचारी दोषी आढळून आले, त्यांना शिक्षा देण्यात आली.