बाबो..! 50 हजारांचा कोंबडा, पण मालक म्हणतोय नाही देणार, खुराक पाहिला का?

सोलापूर – जर कुणी सांगितलं की. एका कोंबड्याची किंमत तब्बल 50 हजार रुपये आहे. तर आपला नक्कीच विश्वास बसणार नाही. परंतु, सोलापुरातील कृषी प्रदर्शनात एक कोंबडा सर्वांच्या आकर्षणाचा विषय ठरतोय. बारामतीतील चोपडजचे शेतकरी यशराज घाडगे यांचा हा कोंबडा असून त्याची किंमत खरंच 50 हजार रुपये आहे. विषेष म्हणजे दिसायला अगदी रुबाबदार असणारा हा राजा कोंबड्याचं वजन देखील तब्बल 6 किलो आहे. त्यामुळे राजा कोंबडा पाहण्यासाठी कृषी प्रदर्शनात मोठी गर्दी होत आहे.

सोलापुरात 54 वे राज्यस्तरीय श्री सिद्धेश्वर कृषी व औद्योगिक प्रदर्शन 2024 भरवण्यात आले आहे. या प्रदर्शनात धिप्पाड रेडा, बैल, गाय असे प्राणी आकर्षणाचे केंद्र असतात. पण यंदा या प्रदर्शनात तब्बल 6 किलोचा राजा कोंबडा सर्वांचे लक्ष वेधत आहे. बारामती येथील चोपडजचे शेतकरी यशराज घाडगे यांचा हा कोंबडा असून त्याची उंची आणि वजन देखील इतर कोंबड्यांपेक्षा जास्त आहे. लहानपणापासूनच दिसायला देखणा असणारा राजा आता 12 महिन्यांचा झाल्याचं शेतकरी यशराज यांनी सांगितलं.