बेदाणा खातोय भाव! सांगलीत पहिल्याच दिवशी 30 टन आवक, किती मिळाला दर?

सांगली: बेदाण्यासाठी सांगलीचं मार्केट प्रसिद्ध आहे. सांगली मार्केट यार्डात नवीन बेदाणा सौद्यास सुरुवात झाली आहे. पहिल्याच दिवशी 30 टन बेदाण्याची आवक झाली. हिरव्या बेदाण्यास प्रतिकिलो 225 तर पिवळ्या बेदाण्यास 191 रुपये दर मिळाला. बेदाण्याचे उत्पादन कमी असल्यामुळे दर तेजीत राहण्याचा व्यापाऱ्यांचा अंदाज आहे. सांगली बाजार समितीमध्ये नूतन बेदाणा सौद्याचा प्रारंभ सभापती सुजय शिंदे यांच्या हस्ते केला. यावेळी संचालक जयाभाऊ नलवडे, शशिकांत नागे, पप्पू मजलेकर, कडप्पा वारद, सचिव महेश चव्हाण, व्यापारी उपस्थित होते.

नवीन बेदाणा सौदा शुभारंभप्रसंगी 7 दुकानात 30 टन नवीन बेदाण्याची आवक झाली. मनेराजुरी गावचे शेतकरी प्रमोद चौगुले यांच्या हिरव्या बेदाण्यास प्रतिकिलो 225 रुपये दर मिळाला. नितीन चौगुले यांच्या हिरव्या बेदाण्यास प्रतिकिलो 221 रुपये दराने व्यापाऱ्यांनी खरेदी केला. पिवळ्या बेदाण्यास प्रतिकिलो 191 रुपये दर मिळाला आहे.