युवा परिवर्तन संस्थेचा कौतुकास्पद उपक्रम, 150 महिलांना दिले गांडूळ खत तयार करण्याचे प्रशिक्षण, इतक्या रुपयांची होणार बचत

ज्योती तरे या शिरसाड गावच्या रहिवासी आहेत. आधी त्यांचा मुलगा गांडूळ खत बाजारातून विकत आणायचा. याबाबत त्या म्हणाल्या की, 'या प्रशिक्षण वर्गामुळे मला गांडूळ खत घरी कसे बनवायचे, हे समजले. सध्या आम्ही ड्रममध्ये रोजचा टाकाऊ भाजीपाला, पालापाचोळा टाकत असून 2 महिन्यांनी गांडूळ खत तयार होईल. या गांडूळ खताचा उपयोग आम्ही पिकांसाठी करणार आहोत, अशी माहितीही ज्योती तरे यांनी दिली.

'प्रत्येक शेतकऱ्याला एका वेळेस 2 ते 3 रासायनिक खताच्या बॅगा लागतात, यासाठी साधारण 3 हजार रुपये खर्च होतात. आता या महिला शेतकरी घरच्या घरी गांडूळ खत बनवत असल्याने यांचा खर्च कमी होईल. गांडूळ खत हे नैसर्गिक असून पिकांच्या वाढीसाठी उपयुक्त असते. यासाठी आम्ही दुबार, तिबार पीक आणि ज्या महिला शेतकऱ्यांकडे दुभती जनावर आहे, त्यांची निवड केली, अशी माहितीही युवा परिवर्तन संस्थेचे समन्वयक सचिन बारवे यांनी दिली. दरम्यान, मागील 24 वर्षांत, युवा परिवर्तन या संस्थेच्या माध्यमातून 1.25 दशलक्षाहून अधिक वंचित तरुण आणि महिलांना रोजगार देण्याचे काम केले आहे. याच संस्थेच्या वतीने महिला सक्षमीकरणासाठी विविध उपक्रमही राबवले जातात.