बच्चू कडू सरकारला फोडणार घाम! तारखेसह नवा प्लॅन ठरला, कर्जमाफीसह मागण्या काय?

बच्चू कडू यांनी काही दिवसांपूर्वीच विदर्भात "शेतकऱ्यांचा सातबारा कोरा करा" या मागणीसाठी पदयात्रा काढली होती. त्यादरम्यानच सरकारकडून मिळालेल्या आश्वासनांची आठवण करून देण्यासाठी आंदोलनाच्या तयारीची दिशा ठरवण्यात आली होती. आता हे आंदोलन रस्त्यावर उतरले असून, विविध ठिकाणी प्रहार कार्यकर्ते आणि शेतकरी रस्त्यावर उतरले आहेत.

महाराष्ट्रातील विविध जिल्ह्यांमध्ये आज प्रहार संघटनेचं आंदोलन सुरू आहे. कर्जमाफीसह शेतमजूर, दिव्यांग, मेंढपाळ, मच्छीमार आदी घटकांच्या मागण्यांचा समावेश आहे. सरकारने दिलेली आश्वासने पूर्ण न केल्याचा आरोप करत, बच्चू कडूंनी सरकारवर थेट हल्ला चढवला आहे.

परतवाड्यात झालेल्या सभेत बच्चू कडू यांनी आक्रमक भाषेत सरकारवर सडकून टीका केली. त्यांनी म्हटलं, “आता तारीख न सांगता थेट मंत्रालयात घुसू. समित्यांचे अध्यक्षही म्हणतात की त्यांना काही माहित नाही. सरकारने लुटलं, तर कर्जमाफी द्यावीच लागेल. आम्ही गुन्हे दाखल होण्यास घाबरणार नाही. आता गांधीगिरी संपली, भगतसिंगगिरी सुरू झाली आहे.”

दरम्यान, नागपूर जिल्ह्यातील गोंडखैरी येथे होणाऱ्या आंदोलनाआधीच पोलिसांनी प्रहार कार्यकर्त्यांवर कारवाई करत काहीजणांना ताब्यात घेतले आहे. रजनीकांत आतकरी यांच्यासह अनेक कार्यकर्त्यांना काल रात्री उशिरा अटक करण्यात आली. यावेळी आंदोलकांनी थेट बच्चू कडूंशी फोनवर संपर्क साधत ही माहिती दिली. कडूंनीही पोलिसांच्या कारवाईवर नाराजी व्यक्त केली व तातडीने सोडण्याची मागणी केली.