शेतकऱ्यांसाठी गुड न्यूज! नमो शेतकरीचा GR आला, इतक्या दिवसांत खात्यात पैसे जमा होणार

केंद्र सरकार ‘पंतप्रधान किसान सन्मान निधी’ योजनेअंतर्गत प्रत्येक पात्र शेतकऱ्याला वर्षातून 6 हजार रुपये देते. त्याच धर्तीवर राज्य सरकारने आणखी ६ हजार रुपयांची तरतूद करून ‘नमो शेतकरी महासन्मान निधी योजना’ सुरू केली. या योजनेत केंद्राच्या लाभार्थ्यांनाच समाविष्ट केले जाते आणि पीएम किसानच्या प्रत्येक हप्त्यासोबत राज्य सरकारचा हप्ता देण्यात येतो. त्यामुळे शेतकऱ्यांना दरवर्षी एकूण 12 हजार रुपयांचा आधार मिळतो.

केंद्र सरकारने पीएम किसानचा 20 वा हप्ता 2 ऑगस्ट रोजी वितरित केला. त्या वेळीच नमो शेतकरी योजनेचाही हप्ता शेतकऱ्यांना मिळणे अपेक्षित होते. मात्र, राज्याच्या आर्थिक भारामुळे आवश्यक निधी तातडीने उपलब्ध न झाल्याने राज्य सरकारकडून हप्ता रोखण्यात आला. सूत्रांच्या माहितीनुसार,निधी उभारणीसाठी काही काळ लागल्याने हा हप्ता जवळपास महिनाभर उशिरा मिळणार आहे.

नमो शेतकरी महासन्मान निधी योजनेअंतर्गत आतापर्यंत सहा हप्ते शेतकऱ्यांच्या खात्यात जमा झाले आहेत. आता एप्रिल ते जुलै २०२५ या कालावधीचा सातवा हप्ता वितरित होणार आहे. यासाठीची सर्व प्रशासकीय व तांत्रिक प्रक्रिया पूर्ण करण्यासाठी पंधरवड्याचा कालावधी लागणार असल्याचे कृषी विभागाच्या अधिकाऱ्यांनी सांगितले.

या हप्त्यामुळे शेतकऱ्यांना खरीप हंगामातील खर्चाला थेट मदत होईल. खत, बियाणे, औषधे, सिंचन आणि इतर शेतीसंबंधी गरजांसाठी २ हजार रुपयांची मदत उपयुक्त ठरेल. सरकारच्या म्हणण्यानुसार, ही योजना शेतकऱ्यांच्या आर्थिक स्थैर्यासाठी सुरू केली असून, पुढील काळात ती अधिक प्रभावीपणे राबविण्याचा मानस आहे.

शासन निर्णयानुसार, वितरित करण्यात येणारा निधी योग्य लाभार्थ्यांच्या खात्यातच पोहोचावा याची जबाबदारी कृषी आयुक्तालयावर असेल. तसेच, प्रत्येक हप्त्यानंतर बँक खात्यात उरलेला निधी आणि त्यावरील व्याज शासनाच्या खात्यात जमा करणे बंधनकारक असेल.