अमेरिकेच्या करारामुळे महाराष्ट्रातील दूध उत्पादक शेतकऱ्यांवर मोठं संकट!

गेल्या काही काळापासून भारत आणि अमेरिका यांच्यात व्यापार करारासाठी चर्चा सुरू आहे. मात्र, या वाटाघाटींमध्ये कृषी आणि दुग्ध उत्पादन ही दोन क्षेत्रे मोठा अडथळा ठरली आहेत. अमेरिकेचा आग्रह आहे की भारताने ही क्षेत्रे आयातीसाठी खुली करावीत, तर भारताने याला स्पष्टपणे नकार दिला आहे. याच मतभेदामुळे हा अंतरिम व्यापार करार रखडला आहे. भारताच्या वाणिज्य मंत्रालयाचे एक पथक या विषयावर पुढील चर्चेसाठी अमेरिकेची राजधानी वॉशिंग्टन येथे पोहोचले आहे, अशी माहिती नुकतीच मिळाली आहे.

भारतातील डेअरी व्यवसाय हा केवळ एक उद्योग नसून ग्रामीण अर्थव्यवस्थेचा तो कणा आहे. हा व्यवसाय देशाच्या एकूण सकल मूल्य वर्धनात (GVA) 2.5 ते 3 टक्के योगदान देतो. भारतातील दूध उत्पादकांना यातून वर्षाला 7.5 लाख कोटी ते 9 लाख कोटी रुपयांचे उत्पन्न मिळते. याव्यतिरिक्त, हे क्षेत्र देशातील सुमारे 8 कोटी लोकांना थेट रोजगार देते.