प्रिया बापट आता मराठीपेक्षाही हिंदी विश्वात अधिक रुळली असल्याचे काहींनी म्हटले होते. तिला पुन्हा एकदा मराठी चित्रपटात पाहण्याची तिच्या चाहत्यांची इच्छा आहे. यासंबंधी बोलताना काही दिवसांपूर्वी प्रियाने तिला मराठी चित्रपटांबाबत कोणतीही ऑफर मिळत नसल्याची खंत व्यक्त केली होती.
advertisement
“आम्ही दोघी” हा प्रियाचा प्रमुख अभिनेत्री म्हणून शेवटचा मराठी चित्रपट होता. प्रियाने एका मुलाखतीत खुलासा केला की तिला २०१८ नंतर एकाही मराठी चित्रपटासाठी विचारणा करण्यात आली नाही. मात्र आता प्रियाच्या चाहत्यांची तिला मराठी सिनेमात पाहण्याची प्रतिक्षा संपणार आहे. लवकरच तिचा मराठी सिनेमा प्रेक्षकांच्या भेटीला येणार आहे. याबाबतची घोषणा स्वतः प्रियाने केली आहे. इतकंच नाही, तर ती या चित्रपटात पहिल्यांदाच एका मराठी अभिनेत्यासह स्क्रीन शेअर करणार आहे. कोण आहे तो अभिनेता?
प्रियाने तिच्या इन्स्टाग्रामवर एक व्हिडीओ पोस्ट केला आहे, ज्यात ती तिच्या नव्या मराठी सिनेमाबद्दल माहिती देत आहे. तिने आपल्या कॅप्शनमध्ये म्हटलंय, "सर्वात थंड हवामानात सर्वात उबदार संघात सामील झाले! या आश्चर्यकारक क्रूचा भाग होण्यासाठी मी खूपच उत्साही आहे! मला हे खूपच खास वाटतेय! सचित बरोबरचा पहिलाच सिनेमा, आणि पुन्हा एकदा माझ्या लाडक्या मुक्ताबरोबर. खूऽऽप मज्जा येणारे. नितीन, श्रमिष्टा, तेजस, पुष्कर आमची Amzing टीम, मला सामील करून घेतल्याबद्दल धन्यवाद! *असंभव* एक अद्भुत कहाणी. १ मे २०२५ पासून जवळच्या चित्रपटगृहात."
दरम्यान, याआधी प्रियाने “आम्ही दोघी” या चित्रपटात मुक्ता बर्वेसोबत काम केलं आहे. सचित पाटीलबरोबरचा हा तिचा पहिलाच सिनेमा आहे. गेल्या सहा वर्षांपासून एकही मराठी चित्रपटाची ऑफर न मिळाल्यामुळे निराश होणारी प्रिया तिच्या आगामी चित्रपटासाठी खूपच उत्सुक असल्याचं पाहायला मिळतंय.