TRENDING:
मुंबई: दाक्षिणात्य सुपरस्टार यश यांच्या आगामी चित्रपट ‘Toxic: A Fairy Tale For Grown-Ups’ च्या टीझरमुळे वाद निर्माण झाला आहे. आम आदमी पार्टीच्या (AAP) महिला आघाडीने या टीझरविरोधात कर्नाटक राज्य महिला आयोगाकडे अधिकृत तक्रार दाखल केली आहे. आपच्या राज्य सचिव उषा मोहन यांनी दाखल केलेल्या तक्रारीत टीझरमधील काही दृश्ये आक्षेपार्ह असून, त्याचा लहान मुलांच्या मानसिक आरोग्यावर विपरीत परिणाम होऊ शकतो, असा आरोप करण्यात आला आहे.
advertisement
आपच्या नेत्यांनी सांगितले की, ही तक्रार “सामाजिक नैतिकतेचे रक्षण करण्यासाठी आणि समाजातील संवेदनशील घटकांचे संरक्षण करण्यासाठी” दाखल करण्यात आली आहे.तक्रारदारांनी आयोगाकडे टीझर तात्काळ मागे घेण्याची तसेच तो सोशल मीडिया प्लॅटफॉर्मवरून हटवण्याची मागणी केली आहे.
या प्रकरणाची दखल घेत कर्नाटक राज्य महिला आयोगाने केंद्रीय चित्रपट प्रमाणपत्र मंडळाला (CBFC) नियमांनुसार तपास करण्यास सांगितले असून, करण्यात आलेल्या कारवाईचा अहवाल सादर करण्याचे निर्देश दिले आहेत.
कारमधील दृश्यामुळे टीझर चर्चेत
यशच्या 40 व्या वाढदिवशी या महिन्याच्या सुरुवातीला ‘Toxic’ चा टीझर प्रदर्शित झाला होता. टीझरमधील कारमध्ये यश आणि एका महिलेतील जवळीक दाखवणारे दृश्य विशेषतः चर्चेत आले. हे दृश्य सोशल मीडियावर मोठ्या प्रमाणात व्हायरल झाले आणि त्यावरूनच वादाला तोंड फुटले.
दरम्यान CBFC सूत्रांनी स्पष्ट केले आहे की, संबंधित टीझर फक्त YouTube वर प्रदर्शित करण्यात आला असून, त्यामुळे तो सेन्सॉर बोर्डाच्या अधिकारक्षेत्रात येत नाही. CBFC अधिकाऱ्यांच्या म्हणण्यानुसार, फक्त चित्रपट आणि थिएटरमध्ये दाखवण्यासाठी तयार केलेले ट्रेलर्स यांनाच प्रमाणपत्र आवश्यक असते. डिजिटल प्लॅटफॉर्मवर प्रसिद्ध होणाऱ्या प्रमोशनल कंटेंटवर CBFC चे नियंत्रण लागू होत नाही.
‘Toxic’ संदर्भात CBFC कडून कोणतेही प्रमाणपत्र नाही
सेन्सॉर बोर्ड सूत्रांनी पुढे सांगितले की, ‘Toxic’ चित्रपट किंवा त्यासंदर्भातील कोणत्याही कंटेंटसाठी आतापर्यंत CBFC कडे प्रमाणपत्रासाठी अर्जच सादर करण्यात आलेला नाही. त्यामुळे ऑनलाइन प्रसिद्ध झालेल्या टीझरचा CBFC च्या मंजुरी किंवा सेन्सॉर प्रक्रियेशी कोणताही संबंध नसल्याचे स्पष्ट करण्यात आले आहे.