युपीएससीच्या पूर्व परीक्षेसाठी अनेक विद्यार्थी संभाजीनगरमध्ये दाखल झाले आहेत. मात्र गुगल मॅपच्या आधारे परीक्षेचं सेंटर शोधणाऱ्या अनेक विद्यार्थी आणि विद्यार्थीनींना परीक्षेला मुकावं लागलंय. विवेकानंद कॉलेजचा पत्ता प्रत्यक्ष ठिकाणापासून गुगल मॅपवर १५ किमी दूर अंतरावर दाखवला जात असल्याने अनेक विद्यार्थ्यांना परीक्षेसाठी वेळेत पोहोचता आलं नाही.
जालन्यावरून आलेल्या विद्यार्थ्याने परीक्षेला येताना कसा गोंधळ झाला याची माहिती दिली. जालन्यावरून निघताना परीक्षा केंद्राचा पत्ता गुगलवर शोधला. विवेकानंद आर्ट्स, सरदार दलीप सिंग कॉमर्स एंड साइंस कॉलेज, समर्थनगर संभाजीनगर असा पत्ता होता. गुगलला टाकल्यानंतर इथून २० किमी लांब वडगाव एमआयडीसीतलं लोकेशन दाखवलं. तिथं पावणे नऊला पोहोचल्यावर पत्ता चुकल्याचं कळलं. तिथून पुन्हा कॉलेजवर आलो, मला दोन मिनिटं वेळ झाल्यानं प्रवेश नाकारला.
advertisement
परीक्षेसाठी जे सेंटर देण्यात आलंय ते कॉलेज गुगल मॅपवर दाखवत नाही. आताही लोकेशन फेच करत नाहीय असं विद्यार्थ्याने म्हटलं. मुलं अभ्यास करून केवळं गुगल मॅप किंवा प्रशासनाच्या छोट्या मोठ्या चुकांमुळे परीक्षेपासून वंचित राहिले. बाहेर गावाहून येणाऱ्यांना शहर माहिती नसतं. गुगल दाखवतं तसं जातात तेव्हा त्या ठिकाणी गेल्यानंतर ते सेंटर नसल्याचं लक्षात येतं. जवळपास ५० विद्यार्थ्यांना परीक्षेपासून मुकावं लागल्याचं विद्यार्थ्यांनी म्हटलंय.