लवंगी फोडून गेले त्यांचा समाचार मी घेणार आहे, अशा शब्दात एकनाथ शिंदे यांनी नाव न घेता गणेश नाईक यांना टोला लगावला. ठाण्यात एका कार्यक्रमात बोलत असताना त्यांनी हा इशारा दिलाय. आपला एकच अॅटमबॉम्बने सुपडा साफ करू, असे शिंदे म्हणाले.
उपमुख्यमंत्री एकनाथ शिंदे संपूर्ण महाराष्ट्रभर फिरत असले, तरी ठाण्यावरची त्यांची नजर हटलेली नाही. ठाण्यामध्ये भाजपने स्वबळावर 75 पारचा नारा दिलाय. तर शिवसेना उबाठा पक्षाचे नेते संजय राऊत यांनीही अबकी बार 75 पारचा दावा केला. ठाण्यात ठाकरे बंधू एकत्र येणार असून इतरांच्या ठिकऱ्या उडतील असं राऊत म्हणाले. त्यावर एकनाथ शिंदेंनी पलटवार केलाय. सध्या मनोमीलन नाटकाचे प्रयोग रंगलेत, असे शिंदे म्हणाले.
advertisement
गेल्या काही दिवसांपासून सातत्यानं विरोधकांसोबतच भाजपचे काही नेतेही एकनाथ शिंदेंना टार्गेट करताना दिसून येतायत. त्यावरुनही शिंदेंनी थेट इशारा दिलाय.. आपला एकच अॅटमबॉम्ब काम तमाम करणार, असे शिंदे म्हणाले.
महापालिका निवडणुकांचं घोडामैदान जवळ आलंय. दिवाळीनंतर म्हणजेच नोव्हेंबर महिन्यात निवडणूक कार्यक्रम जाहीर होण्याची शक्यता आहे. त्यामुळे सगळेच पक्ष कामाला लागले असून वादांचे हे फटाके दिवाळीनंतरही फुटत राहणारेत.