महायुतीची जोरदार हालचाल
राज्यात सत्तेत असलेल्या महायुतीच्या मोठ्या नेत्यांनी गोकुळच्या सत्ता समीकरणात थेट लक्ष घातले आहे. त्यामुळे आता कोल्हापूरमधील 'मुन्ना विरुद्ध बंटी' या राजकीय संघर्षाला नवं वळण आलं. गोकुळ दूध महासंघाच्या माध्यमातून कोल्हापूरमधील ग्रामीण भागात वर्चस्व मिळवण्याची एक संधी निर्माण होते. त्यामुळेच मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार यांनी याबाबत विशेष लक्ष केंद्रीत केले आहे. गोकुळमध्ये सत्तेत असलेले नेते हसन मुश्रीफ यांच्यावरच समन्वयाची जबाबदारी सोपवण्यात आली आहे.
advertisement
डोंगळेंचं बंड शांत, पण सत्ता हाताबाहेर?
सध्याचे अध्यक्ष अरुण डोंगळे यांचे बंड शांत करण्यासाठी हसन मुश्रीफ यांनी मध्यस्थी केली होती. त्यांनी सतेज पाटील यांच्याशी सहकार टिकवण्याचा प्रयत्न केला होता. मात्र, आता वरिष्ठ पातळीवरून आलेल्या आदेशामुळे त्यांनी आपला रोख बदलला असून, महायुती गटाला नेतृत्व देण्याकडे कल दर्शवला असल्याची चर्चा सुरू आहे.
कोणाची नावे अध्यक्षपदासाठी?
भाजपचे अंबरीश घाटगे आणि शिवसेनेचे अजित नरके यांची नावे अध्यक्षपदाच्या शर्यतीत आघाडीवर आहेत. जर महायुतीचे संख्याबळ तसेच राहिले, तर गोकुळचा कारभार पुन्हा एकदा महाडीक गटाच्या हातात जाऊ शकतो.
तडजोड होणार?
कोल्हापूरच्या सहकार क्षेत्रात सतेज पाटील आणि हसन मुश्रीफ यांच्यात मैत्रीपूर्ण आघाडी आहे. गोकुळमधील सत्तांतराचा फटका इतर ठिकाणी बसू नये यासाठी मुश्रीफ सक्रीय झाले आहेत. गोकुळच्या अध्यक्षपदी थेट महायुतीचा अध्यक्ष करण्याऐवजी मुश्रीफ हे आपल्या मुलाला अध्यक्षपदी संधी देऊ शकतात. तसे झाल्यास नाविद मुश्रीफ हे गोकुळ दूधसंघाचे अध्यक्ष होऊ शकतील.
सध्याचे संचालक मंडळातील बलाबल
सतेज पाटील आणि हसन मुश्रीफ यांच्या राजर्षी शाहू आघाडीचे – 17 संचालक
महाडीक गटाकडे – 4 संचालक
महायुती आणि मित्रपक्षाकडे – 10 जागा
महाविकास आघाडीकडे – 8 जागा
हसन मुश्रीफ यांच्याकडे स्वतंत्रपणे – 3 जागा