TRENDING:
एकनाथ शिंदे यांनी संजय शिरसाट यांची मंत्रिमंडळात नियु्क्ती केल्यानंतर आता छत्रपती संभाजीनगरच्या पालकमंत्रिपदाची जबाबरदारीही दिली आहे. त्यामुळे शिरसाट यांचा नागरी सत्काराचा कार्यक्रम छत्रपती संभाजीनगर येथे पार पडला. या कार्यक्रमाला आमदार आशिष जैस्वाल, आमदार संजना जाधव उपस्थित होते. या सत्काराला उत्तर देताना शिरसाट यांनी जोरदार भाषण ठोकले. राजकीय विरोधकांवर तोंडसुख घेतानाच त्यांनी स्वपक्षीयांवरही टीकेचे बाण सोडले.
advertisement
मंत्री झालो, पालकमंत्री झालो, सगळं स्वप्नवत वाटतंय, आता पालकमंत्री काय असतो हे दाखवतो
एकनाथ शिंदे यांचा मला फोन आला, तुला मंत्रिपदाची शपथ घ्यायची आहे. शपथ घेताना सुरुवातीला मला खूप भीती वाटत होती, हात पाय लटपट कापत होते. शपथ घेताना माझ्या बाजूला प्रताप सरनाईक होते. त्यांना माझी अवस्था माहिती आहे. एकवेळ खायला अन्न मिळत नव्हते, तो माणूस आज मंत्री झाला, पालकमंत्री झाला, हे सगळं स्वप्नवत असल्याचे शिरसाट म्हणाले. तसेच पालकमंत्री काय असतो आणि त्याची काय पॉवर असते, हे माझ्या कामातून दाखवून देतो, असेही शिरसाट म्हणाले.
यंदा पैसे जास्त लागले पण मी पण हात मोकळा केला
निवडणुकीच्या काळात मला पाडण्यासाठी अनेकांनी प्रयत्न केला. मी कसा पराभूत होईल, यासाठी अनेकांनी डाव रचले. पण त्यांचे डाव मी उधळून लावले. कारण माझं नावच संजय आहे, मला पुढचे दिसते. मी कोणत्याही गोष्टीचे टेन्शन घेत नाही पण समोरच्याचा करेक्ट कार्यक्रम करतो. इतर वेळीपेक्षा यंदाच्या निवडणुकीत जास्त पैसे लागले पण मीही मोकळा हात केला. मंत्री झालोय, एकनाथ शिंदे यांच्या आशीर्वादाने पालतमंत्रीही झालोय, पुढची पाचही वर्ष मीच पालकमंत्री राहणार आहे. कारण एकनाथ शिंदे जेव्हा पाठीशी उभे राहतात तेव्हा चिंतेची गरज नसते, असे शिरसाट म्हणाले.