मिळालेल्या माहितीनुसार, सोलापूर शहरातील अक्कलकोट रोड एमआयडीसी परिसरात सेंट्रल इंडस्ट्री नावाचा टॉवेल निर्मिती कारखाना आहे. या कारखान्याला मध्यरात्री तीनच्या सुमारास भीषण आग लागली. आगीची घटना समोर आल्यानंतर तातडीने घटनास्थळी अग्निशमन दलाला पाचारण करण्यात आलं. पहाटे तीन वाजल्यापासून घटनास्थळी तब्बल १० अग्नीशमन दलाच्या गाड्या दाखल झाल्या आहेत. आगीवर नियंत्रण मिळवण्याचं काम सुरू आहे.
advertisement
अग्निशमन दलाने आतापर्यंत आगीतून चार गंभीर अवस्थेत बाहेर काढलं आहे. या चारही जणांचा होरपळून मृत्यू झाल्याचं सांगण्यात येत आहे. अक्कलकोट रोड एमआयडीसीतील कारखान्यातून धुराचे लोट सर्वदूर पसरले आहेत. त्यामुळे परिसरात मोठ्या प्रमाणात भीतीचं वातावरण पसरलं आहे. अग्निशमन दलाची 10 वाहने आगीवर नियंत्रण मिळण्यासाठी प्रयत्न करत आहे. पहाटे तीन ते पावणेचारच्या दरम्यान आग लागल्याचे सांगण्यात येत आहे. तेव्हापासून आग आटोक्यात आणण्याचं काम सुरू आहे.
दरम्यान, सोलापूर महापालिकेचे चीफ फायर ऑफिसर राकेश साळुंखे आणि अन्य एक फायर कर्मचारी आगीवर नियंत्रण मिळवताना अंशतः भाजल्याची माहिती देखील समोर आली आहे. आग आटोक्यात आणण्यासाठी सर्व शासकीय यंत्रणा प्रयत्न कार्यरत आहे. आगीचे कारण अजून पर्यंत समजले नाही. आग विझवण्याचं काम सुरू आहे.