TRENDING:
कुटुंबावर ओढावलेले संकट बाजूला सारून पक्षाच्या भविष्याकरिता धीरोदात्तपणे सुनेत्रा पवार यांनी पुढे येऊन राज्याच्या उपमुख्यमंत्रिपदाची सूत्रे स्वीकारली आहेत. विधिमंडळ गटनेतेपदी त्यांची निवड झाल्यानंतर शनिवारी सायंकाळी पाच वाजता त्यांचा शपथविधी कार्यक्रम संपन्न झाला. राज्याच्या इतिहासात पहिल्याच महिला उपमुख्यमंत्री म्हणून त्यांची नोंद झाली आहे. शपथविधीवेळी राष्ट्रवादीच्या आमदारांनी अजितदादा अमर रहे, एकच वादा अजितदादा, अशा घोषणा दिल्या. त्यांच्या घोषणांनी राजभवनाचा दरबार हॉल दुमदुमून गेला होता.
advertisement
शपथविधीनंतर सुनेत्रा पवार तातडीने बारामतीला रवाना, 'तोपर्यंत' मंत्रालयात येणार नाही
शपथविधी कार्यक्रम झाल्याबरोबर सुनेत्रा पवार तातडीने बारामतीला रवाना होणार आहेत. त्यांच्यासोबत त्यांचे पुत्र जय पवार असतील. शपथविधीनंतर सार्वजनिक जीवनात लगोलग सक्रीय न होता किंबहुना शासनाची सूत्रे लगोलग हातात न घेता अजित पवार यांचा दशक्रिया विधी होईपर्यंत बारामतीमध्येच थांबणार असल्याचा निर्णय सुनेत्रा पवार आणि कुटुंबाने घेतला आहे. खातेवाटप जाहीर झाले तरीही दुखवटा संपेपर्यंत मंत्रालयात न येण्याचे त्यांनी ठरवले आहे.
तत्पूर्वी राष्ट्रवादी विधिमंडळ पक्षाच्या बैठकीत सुनेत्रा पवार यांची एकमताने विधिमंडळ पक्षाच्या नेतेपदी निवड करण्यात आली. तसेच पक्षाचे सर्वाधिकार देखील त्यांच्याकडे बहाल करण्यात आले.
राष्ट्रवादीची एक बैठक- दोन ठराव
विधिमंडळ राष्ट्रवादी काँग्रेस पक्षाच्या सदस्यांची बैठक विधान भवन, मुंबई येथे दि. ३१ जानेवारी, २०२६ रोजी दुपारी दोन वाजता खासदार प्रफुलभाई पटेल, राष्ट्रीय कार्याध्यक्ष यांच्या प्रमुख उपस्थितीत आणि खासदार सुनिल तटकरे, प्रदेशाध्यक्ष, नॅशनॅलिस्ट (राष्ट्रवादी) काँग्रेस पार्टी, महाराष्ट्र प्रदेश यांच्या अध्यक्षतेखाली संपन्न झाली. या बैठकीत दोन ठराव घेण्यात आले.
१) महाराष्ट्र विधिमंडळ पक्ष नेतेपदी श्रीमती. सुनेत्रा अजितदादा पवार यांची एकमताने निवड करण्यात यावी तसेच २) विधिमंडळ राष्ट्रवादी काँग्रेस पक्षाबाबतचे सर्व निर्णय घेण्याचे अधिकार सुनेत्रा अजितदादा पवार यांना देण्याबाबतचे दोन ठराव श्री. छगन भुजबळ यांनी मांडले. या दोन्ही ठरावांस हसन मुश्रीफ, दिलीप वळसे पाटील, धनंजय मुंडे, नरहरी झिरवाळ, संजय बनसोड यांनी अनुमोदन दिले.