रिकॉर्डब्रेक वेग आणि सध्याचे दर
सोन्याच्या किमतीतील वाढीचा वेग इतका जबरदस्त आहे की, आंतरराष्ट्रीय बाजारात शेवटची १,००० डॉलरची वाढ केवळ २०७ दिवसांमध्ये झाली आहे. भारतीय बाजारातही सोन्याची चमक कायम आहे. दिल्ली सराफा बाजारात २४ कॅरेट सोन्याचा भाव आज, शुक्रवारी १,२६,००० रुपये प्रति १० ग्रॅम इतका नोंदवला गेला. भारतात सन २०२५ मध्येच सोन्याच्या दरात ६० टक्क्यांहून अधिक वाढ झाली आहे. मात्र, या विक्रमी तेजीनंतर आता गुंतवणूकदारांना प्रश्न पडला आहे की, आता सोनं घ्यावं का? खरेदी केलं तर कमी होईल की वाढेल, मला तेवढा फायदा होईल का?
advertisement
करेक्शनची शक्यता
काही विश्लेषकांचे मत आहे की, सोने सध्या 'ओवरबॉट झोन' मध्ये पोहोचले आहे. म्हणजे याची किंमत खूप वेगाने वाढली आहे आणि तांत्रिक विश्लेषण (Technical Analysis) सूचित करते की, येत्या काही महिन्यांत किमतीत थोडी 'करेक्शन' (घट) होण्याची शक्यता आहे. थोडक्यात, गुंतवणूकदारांनी नफा काढल्यामुळे (Profit Booking) तात्पुरती घसरण पाहायला मिळू शकते.
तेजी कायम राहणार
याउलट, गोल्डमॅन सॅक्स सारख्या मोठ्या वित्तीय संस्थांचे मत आहे की, सध्याची परिस्थिती सोन्याच्या पूर्णपणे बाजूने आहे आणि त्याची ही वाढ कायम राहील. गोल्डमॅन सॅक्सच्या अंदाजानुसार, सोन्याचा दर २०२६ च्या अखेरपर्यंत $४,९०० (४ हजार ९०० डॉलर) प्रति औंसपर्यंत जाऊ शकतो. म्हणजेच, यात सध्याच्या दरापेक्षा २२.५% अधिक वाढ अपेक्षित आहे. हा अंदाज खरा ठरल्यास, भारतात सोन्याचा दर साधारणपणे ₹१.३७ लाख प्रति १० ग्रॅमपर्यंत पोहोचू शकतो. याचे मुख्य कारण म्हणजे, जगभरातील मध्यवर्ती बँका आणि ईटीएफ गुंतवणूकदार सोन्याची मागणी सातत्याने वाढवत आहेत.
सोने ठरले सर्वात फायदेशीर गुंतवणूक
जागतिक बाजारपेठेत जेव्हा अनिश्चिततेचे वातावरण होते, तेव्हा म्हणजेच ऑक्टोबर २०२२ मध्ये सोन्याचा दर सुमारे $१,४३७ प्रति औंस होता. अवघ्या तीन वर्षांत, ऑक्टोबर २०२५ मध्ये तो $४००० वर पोहोचला. याचा अर्थ, सोन्याने १८०% चा जबरदस्त परतावा दिला आहे.
गुंतवणुकीच्या भाषेत सांगायचे झाल्यास, सोन्याचा वार्षिक सरासरी परतावा सुमारे ४०% राहिला आहे. विशेष म्हणजे, २०२२ आणि २०२३ मध्ये सोन्याने २०-२०% ची वाढ दिली, तर २०२५ या एकाच वर्षात सोन्याच्या दरात ५३% पर्यंत मोठी वाढ नोंदवली गेली आहे. १, ३, ५, १० आणि २० वर्षांच्या काळात सोन्याने अनुक्रमे ४७%, ३३%, १५%, १३% आणि ११% असा मजबूत परतावा दिला आहे.