वडिलांचं निधन अन् स्वप्नांचा चुराडा! आता दुसऱ्याच्या यशासाठी झटतोय हा पुणेकर!

एखादा मोठा अधिकारी होण्याचं अनेकाचं स्वप्न असतं. परिस्थितीमुळे अनेकांना त्या दिशेनं जाता देखील येत नाही. तरीही दुसऱ्याच्या यशात आपलं स्वप्न पाहून त्यांना मदत करण्याचं काम काहीजण करत असतात. पुण्यातील गणेश पवार हे असंच मोठं काम करत आहेत.

गणेश याचं गोखलेनगर येथे झेरॉक्सचे दुकान आहे. ते गेल्या काही वर्षांपासून गरीब आणि गरजू विद्यार्थ्यांना मोफत झेरॉक्स देतात. तसेच एमपीएससी आणि युपीएससीची पूर्व परीक्षा पास झालेल्या विद्यार्थ्यांना मोफत लायब्ररीची सुविधा देखील पुरवतात. त्यांच्या या सहकार्यामुळे काही अधिकारी घडले आहेत.

गणेश पवार यांच्या वडिलांचं 1980 साली निधन झालं. तेव्हा ते 5 वर्षांचे होते. त्यानंतर आईनेच 5 भावंडांचा सांभाळ केला.  आई फार कष्ट करत आम्हाला खाऊ घालत होती. पुढे आई मजुरी करायला लागली आणि आठवीत असताना कपबशी धुण्यासारखी कामे करून आईला मदत करायला सुरुवात केली, असं गणेश सांगतात.

गणेश यांनी स्वत:चं शिक्षण देखील काम करतच पूर्ण केलं. पदवीपर्यंतचं शिक्षण झाल्यानंतर उत्पन्नाचं साधन म्हणून झेरॉक्स सेंटर सुरू केलं. त्यानंतर शिक्षण थांबलं. मात्र, स्पर्धा परीक्षा करणाऱ्या मुलांकडं पाहिलं की भूतकाळ आठवत होता. समाजाचं काहीतरी आपणही देणं लागतो, म्हणून या मुलांना मदतीचा निर्णय घेतला.

फार मोठी मदत करू शकत नव्हतो. मात्र, गोरगरिब विद्यार्थ्यांना एमपीएससी आणि युपीएससी पास पूर्व परीक्षा पास केल्यावर झेरॉक्स मोफत द्यायला सुरुवात केली. तसेच त्यांना गरज असल्यास त्यांना अभ्यासिकेसाठीही मदत करतो, असं गणेश सांगतात.

लहानपणी आईला सांगायचो मी कलेक्टर होईल परंतु परिस्थितीने साथ नाही दिली. आपण नाही झालो तरी आपलं स्वप्न त्यांच्यात बघू शकतो. पुढे दोन अभ्यासिका सुरू केल्या. गरीब विद्यार्थी पूर्व परीक्षा पास झाल्यानंतर पुढे मेन्सची तयारी करतात. परस्थितीमुळं त्यांना आर्थिक अडचणी असतात त्यांना गणेश हे मोफत अभ्यासिका देतात.

मी अगदी छोटंसं काम करतो. या मुलांना सगळ्यांची जाण असल्यामुळे ते कधीही विसरत नाहीत. 2002 पासून दुकान होतं. 2013 नंतर स्पर्धा परीक्षा करणाऱ्या मुलांना मदत करायला सुरुवात केली. आज अनेक मुलांनी पोस्ट देखील मिळवल्या आहेत. त्यामुळे खरंच खूप छान वाटतं, अशा भावना गणेश पवार यांनी व्यक्त केल्या. (प्राची केदारी, प्रतिनिधी)