Madhuri Dixit: 58 वर्षीय माधुरीने भल्याभल्या पैलवानांना लोळवलं; 'मिसेस देशपांडे'साठी केलं असं काही... होतंय कौतुक

मुंबई: आपल्या एका स्मितहास्याने आणि अदांनी गेली चार दशकं प्रेक्षकांच्या हृदयावर राज्य करणारी माधुरी दीक्षित सध्या एका वेगळ्याच अवतारामुळे चर्चेत आली आहे. वयाची पन्नाशी ओलांडल्यानंतरही माधुरीचा उत्साह एखाद्या विशीतल्या तरुणीला लाजवेल असा आहे.

आजवर आपण तिला रोमँटिक हिरोईन किंवा प्रेमळ आईच्या भूमिकेत पाहिलंय, पण 'मिसेस देशपांडे' या नवीन सीरिजमध्ये माधुरी चक्क जबरदस्त ॲक्शन करत गुंडांची हाडं खिळखिळी करताना दिसत आहे.

आजकालच्या ॲक्शन चित्रपटांमध्ये मोठे स्टार्स स्टंट्ससाठी बॉडी डबलचा वापर करतात, पण माधुरीने या सीरिजसाठी कठोर मेहनत केली आहे. 'मिसेस देशपांडे'मध्ये माधुरीने सर्व अ‍ॅक्शन सीन्स स्वतः केले आहेत. तिने यासाठी कोणतीही बॉडी डबल वापरण्यास स्पष्ट नकार दिला.

याबद्दल बोलताना माधुरीने सांगितलं, "प्रेक्षकांना हे खरं वाटायला हवं. जेव्हा एखादी मध्यमवयीन, साधी गृहिणी तिच्यापेक्षा दुप्पट आकाराच्या पुरुषाशी दोन हात करते, तेव्हा त्यात एक वेगळीच ताकद असते. ते नैसर्गिक दिसावं म्हणूनच मी स्वतः हे स्टंट्स करायचं ठरवलं." इस्रायली स्वसंरक्षण कला असलेल्या 'क्राव मागा'चे धडे गिरवून माधुरीने पडद्यावर जो राडा घातला आहे, ते पाहून प्रेक्षकांना आपल्या डोळ्यांवर विश्वास ठेवणं कठीण झालं आहे.

माधुरी दीक्षित आणि 'निर्दयी खुनी' हे समीकरण कोणालाही पटणारं नाही, पण हाच आश्चर्याचा धक्का तिने आपल्या चाहत्यांना दिला आहे. या सीरिजमध्ये ती एका गुन्हेगाराच्या भूमिकेत आहे.

मुंबईत होणाऱ्या खुनांच्या मालिकेचं कनेक्शन मिसेस देशपांडेच्या भूतकाळाशी जोडलं जातं आणि पोलीस ही सिरिअल किलर केस सोडवण्यासाठी चक्क तिची मदत घेतात. एका खुन्याचा शोध घेण्यासाठी दुसऱ्या खुन्याची मदत घेण्याची ही थरारक कथा JioHotstar वर १९ डिसेंबरपासून धुमाकूळ घालत आहे.

आपल्या आजवरच्या प्रवासावर भाष्य करताना माधुरीने एक खूप महत्त्वाची गोष्ट सांगितली. तिने म्हटलं की, "लॉकडाऊनच्या काळात प्रेक्षक जगभरातील सिनेमा पाहू लागले आहेत. आता त्यांना केवळ ग्लॅमर नकोय, तर जिवंत अभिनय हवा आहे. माझ्या करिअरची सुरुवात 'अबोध'पासून झाली तेव्हापासून मी नियम मोडत आले आहे. महिलांना अशा कणखर आणि नकारात्मक छटा असलेल्या भूमिका मिळणं ही काळाची गरज आहे."