स्वतःला आरशात पाहून ढसाढसा रडायची अभिनेत्री, शेवटी केला निश्चय! आज TV ची सर्वांत ग्लॅमरस हिरोईन

मुंबई: छोट्या पडद्यावरच्या 'बालिका वधू' मालिकेतील 'आनंदी'च्या भूमिकेने घराघरात पोहोचलेली आणि आजही प्रेक्षकांच्या मनात घर करून राहिलेली अभिनेत्री म्हणजे अविका गौर. आज ३० जून रोजी तिचा वाढदिवस आहे. या खास दिवशी आपण अविकाच्या एका अविश्वसनीय प्रवासाविषयी जाणून घेणार आहोत, तिच्या 'वेट लॉस' म्हणजेच वजन कमी करण्याच्या प्रवासाविषयी!

एक काळ असा होता, जेव्हा अविकाने आरशात स्वतःला पाहिलं आणि तिला अश्रू आवरता आले नाहीत. त्यानंतर तिने स्वतःमध्ये इतकं जबरदस्त परिवर्तन केलं की, ते पाहून लोक अक्षरशः थक्क झाले. अविका गौरने काही वर्षांपूर्वी तिच्या इन्स्टाग्रामवर एक पोस्ट शेअर करत, तिच्या वाढलेल्या वजनापासून ते ते कमी करण्याच्या प्रवासाची कहाणी उघड केली होती.

अविकाने तिच्या त्या लांबलचक पोस्टमध्ये सांगितलं होतं, "मला आजही आठवतंय. गेल्या वर्षी जेव्हा मी स्वतःला आरशात पाहिलं, तेव्हा मी रडले होते. मी जशी दिसत होते, ते मला अजिबात आवडत नव्हतं. जाडसर बाहू, जाडसर पाय आणि सुटलेलं पोट. जर हे सगळं थायरॉईड किंवा पीसीओडीमुळे असतं, तर ठीक होतं, कारण ते माझ्या नियंत्रणाबाहेर होतं. पण हे सगळं माझ्या जास्त खाण्यामुळे आणि काहीही खाण्यामुळे होतं. मी अजिबात वर्कआउट करत नव्हते."

अविका पुढे म्हणाली, "आपल्या शरीराला काळजीची गरज असते, पण मी कधीच माझ्या शरीराचा आदर केला नाही. परिणाम असा झाला की, मी जशी दिसायला लागले होते, ते मला अजिबात आवडत नव्हतं. मला डान्स करायला खूप आवडतो, पण मी डान्स करणंही एन्जॉय करू शकत नव्हते. मी फक्त स्वतःला जज करण्यात व्यस्त होते."

मग एका दिवशी अविकाने आपल्या सर्व चिंता बाजूला ठेवून वजन कमी करण्याचा निश्चय केला. यानंतर तिने पौष्टिक अन्न खायला सुरुवात केली आणि वर्कआउटही सुरू केलं. या काळात तिला अनेक अडचणी आल्या, पण तिने स्वतःला थांबवलं नाही. तिचे मित्रही तिला खूप प्रेरणा देत होते.