Tanya Mittal Mother: जे तान्या मित्तलला नाही जमलं, ते तिच्या आईने करून दाखवलं! पहिल्यांदाच कॅमेरासमोर येत सर्वांचीच बोलती बंद केली

मुंबई: यंदाचं बिग बॉसचं सीझन तुफान गाजलं. या सीझनमध्ये ड्रामा, भांडण, मजामस्ती, मैत्री-दुश्मनी सर्व काही पाहायला मिळालं. गौरव खन्ना या पर्वाचा विजेता ठरला असला, तरीही या सीझनमध्ये एकाच नावाची चर्चा होती, ती म्हणजे करोडपती तान्या मित्तल. तान्या मित्तलच्या श्रीमंतीच्या दाव्यांनी शोमधील प्रत्येकाला घाम फोडला.

घरात असताना तान्या नेहमीच तिच्या महागडे शौक, तिची लाइफस्टाइल आणि "माझ्या किचनमध्येही लिफ्ट आहे," अशा विधानांमुळे ट्रोल झाली. अनेकांनी तिला 'फेकू' म्हटलं, तर काहींनी तिची खिल्ली उडवली. पण आता तान्याच्या आईने पहिल्यांदाच कॅमेरासमोर येत सर्वांना झापलं आहे.

तान्याच्या आईने एका नुकत्याच दिलेल्या मुलाखतीत स्पष्ट केलं की, तान्या घरात जे काही बोलली ते १०० टक्के सत्य होतं. तिने सांगितलं, "लोकांना वाटलं ती दिखावा करतेय, पण तिने काहीही लपवलं नाही. आमच्याकडे खरंच महागड्या गाड्या आहेत, मोठं घर आहे आणि हो, तिच्या बोलण्याप्रमाणे घरात सोयीसुविधाही आहेत. पण केवळ तिच्या श्रीमंतीमुळे तिला घरात टार्गेट केलं गेलं, हे पाहून आम्हाला खूप त्रास झाला."

सोशल मीडियावर सध्या तान्याच्या घराचे आणि गाड्यांचे व्हिडिओ व्हायरल होत आहेत, ज्यामुळे तिचे दावे आता खरे ठरताना दिसत आहेत.

मुलाखती दरम्यान तान्याची आई भावूक झाली होती. तिने विचारलं, "बिग बॉसच्या मेकर्सना माझा एकच प्रश्न आहे की, फक्त एकाच मुलीला का टार्गेट करण्यात आलं? ती रडली तरी तिला बोललं गेलं, ती हसली तरी तिला टोमणे मारले गेले. तिच्या अंगावर पाणी फेकण्यापर्यंत मजल गेली. जर तिची काही चूक असती तर आम्ही मान्य केलं असतं, पण ती काहीही चुकीचं करत नसताना तिला मानसिक त्रास दिला गेला."

तान्याच्या आईने सांगितलं की, घरामध्ये तान्याला ज्या पद्धतीने वागवण्यात आलं, ते पाहून संपूर्ण कुटुंब रात्री-रात्री जागून काढत होतं. तिच्या सुरक्षिततेची आम्हाला सतत चिंता वाटायची.

तान्याच्या आईने तिच्या संगोपनाबद्दलही काही गोष्टी सांगितल्या. तान्याला केवळ आई-वडिलांनीच नाही, तर तिच्या काका-काकूंनी, मामा-मावशींनी आपल्या पोटच्या पोरासारखं वाढवलं आहे.

"तिच्या मधल्या काकूंनी तिला 'राम-राम' म्हणायला आणि देवाच्या प्रार्थना करायला शिकवलं, तर तिच्या लहान काकांनी तिला शिस्त आणि तासनतास अभ्यास करण्याची गोडी लावली. तिच्या या वागण्यावरूनही घरात तिला चिडवलं गेलं, पण तेच तिचे खरे संस्कार आहेत," असं आईने अभिमानाने सांगितलं.