Dharmendra: "तुझ्या दोन आई..." ईशा देओलला शाळेत विचारला विचित्र प्रश्न, लेकीला हेमा मालिनींनी काय उत्तर दिलं?

मुंबई: बॉलिवूडचे 'ही-मॅन' म्हणून ओळखले जाणारे दिग्गज अभिनेते धर्मेंद्र यांनी वयाच्या ८९ व्या वर्षी जगाचा निरोप घेतला. त्यांच्या निधनानंतर त्यांच्या खासगी आयुष्यातील अनेक किस्से पुन्हा एकदा चर्चेत आले आहेत.

धर्मेंद्र यांनी दोन विवाह केले होते, हे तर सर्वांनाच माहीत आहे, पण त्यांची मुलगी ईशा देओलला हे सत्य कसे आणि कधी कळले, याचा खुलासा खुद्द ईशा देओलनेच केला आहे.

धर्मेंद्र आणि अभिनेत्री हेमा मालिनी यांच्या विवाहाला आजही बॉलिवूडमधील सर्वात वादग्रस्त प्रेमकथांपैकी एक मानले जाते. १९८० मध्ये धर्मेंद्र यांनी पहिल्या पत्नी प्रकाश कौर यांना घटस्फोट न देता हेमा मालिनींशी विवाह केला.

त्यांनी धर्म परिवर्तन करून लग्न केले, असेही म्हटले जाते. ईशा देओलचा जन्म १९८१ मध्ये झाला, तर तिची बहीण आहाना देओलचा जन्म १९८५ मध्ये झाला.

ईशा देओलला धर्मेंद्र यांच्या पहिल्या लग्नाबद्दलचे सत्य अगदी लहानपणी, म्हणजेच ती चौथ्या इयत्तेत असताना कळले. आश्चर्याची गोष्ट म्हणजे, तिला हे घरातून नाही, तर एका मैत्रिणीकडून समजले.

हेमा मालिनी यांच्या आत्मचरित्र 'हेमा मालिनी: बियोन्ड द ड्रीम गर्ल' मध्ये ईशा देओलने या घटनेवर भाष्य केले आहे. ईशा देओलने सांगितले, "माझी वर्गमैत्रीण मला म्हणाली होती, 'तुम्हाला दोन आई आहेत ना?' तेव्हा मी तिच्यावर खूप चिडले. 'ही काय बकवास आहे? माझी फक्त एकच आई आहे,' असे मी तिला उत्तर दिले."

ईशा म्हणाली, "मी शाळेतून घरी पोहोचताच हा प्रश्न आईला विचारला. मला वाटते, हाच क्षण होता, जेव्हा माझ्या आईने मला सत्य सांगण्याचा निर्णय घेतला."

ईशाने पुढे सांगितले, "कल्पना करा, मी चौथ्या इयत्तेत होते आणि मला याबद्दल काहीही माहिती नव्हते. पण सत्य सांगायचे तर, माझ्या आईने आधीच विवाहित असलेल्या व्यक्तीशी लग्न केले, ज्याला त्याचे स्वतःचे कुटुंब आहे, हे कळल्यावर मला कधीही वाईट वाटले नाही."

धर्मेंद्र शूटिंगच्या व्यग्रतेमुळे हेमा मालिनी आणि मुलींसोबत कायमस्वरूपी राहत नसत. मुंबईत त्यांना शूटिंगमधून वेळ मिळाला की, ते मुलींना भेटायला नक्की जात असत. त्यांच्या अभ्यास आणि जीवनातील इतर बाबींची ते पूर्ण काळजी घेत असत.