प्रियांकाचा उपवास, बायकोला उपाशी पाहून अस्वस्थ झाला निक, केला असा पराक्रम... जगभरात होतेय चर्चा

मुंबई: प्रियांका चोप्रा या नावाची क्रेझ आता फक्त देशातच नाही, तर जगभरात आहे. आपली 'देसी गर्ल' प्रियांका चोप्रा आज जागतिक स्तरावर कितीही मोठी स्टार झाली असली, तरी तिची नाळ अजूनही भारतीय संस्कृतीशी घट्ट जोडलेली आहे.

नुकताच नेटफ्लिक्सवर 'द ग्रेट इंडियन कपिल शो'चा चौथा सीझन सुरू झाला असून, या सीझनची पहिली पाहुणी ठरली ती म्हणजे प्रियांका चोप्रा! या शोमध्ये प्रियांकाने आपल्या वैयक्तिक आयुष्यातील असे काही खुलासे केले की, खुद्द कपिल शर्माही चकित झाला. विशेषतः पती निक जोनसने प्रियांकासाठी केलेला एक रोमँटिक पराक्रम सध्या सोशल मीडियावर चर्चेचा विषय ठरला आहे.

२०१८ मध्ये निक जोनससोबत लग्न करून अमेरिकेत स्थायिक झालेली प्रियांका आजही दरवर्षी न चुकता करवा चौथचा उपवास करते. प्रियांकाने सांगितलं की, निक जोनसला हा सण खूप आवडतो.

निकचं म्हणणं असतं, "वाह! माझ्या दीर्घायुष्यासाठी तू दिवसभर काहीही न खाता राहतेस, हे किती छान आहे!" पण एकदा हा उपवास सोडताना जी परिस्थिती ओढवली होती, ती एखाद्या चित्रपटाच्या क्लायमॅक्सपेक्षा कमी नव्हती.

प्रियांकाने त्या रात्रीची आठवण सांगताना म्हटलं, "एका वर्षी करवा चौथ होता आणि निकचा एका मोठ्या स्टेडियममध्ये कॉन्सर्ट सुरू होता. तिथे जवळपास ६० ते ७० हजार लोक जमले होते. १० वाजले, ११ वाजले, पण आकाशात चंद्र काही दिसेना. मुळात तेव्हा ढगाळ वातावरण होतं आणि पाऊस पडण्याची चिन्हं होती. मी भुकेली होते आणि चंद्राची वाट पाहत होते, पण ढगांमुळे तो दिसतच नव्हता."

निक स्टेजवर परफॉर्म करत होता, पण त्याचं लक्ष आपल्या पत्नीकडे होतं. आपल्या पतीच्या दीर्घायुष्यासाठी प्रियांकाने दिवसभर पाणीही प्यायलं नव्हतं आणि आता चंद्रच दिसेनासा झाल्याने निक अस्वस्थ झाला.

प्रियांकाच्या आयुष्यातील तो सर्वात रोमँटिक क्षण होता. निकने वेळ न घालवता प्रियांकाला घेतलं आणि थेट आपल्या प्रायव्हेट जेटमध्ये बसवलं. निकने पायलटवा विमान ढगांच्या वर नेण्यास सांगितलं. जेव्हा विमान ढगांच्या उंचीच्या पलीकडे गेलं, तेव्हा लख्ख चांदण्या आणि चमकणारा चंद्र त्यांच्या समोर होता.

प्रियांका सांगते, "ते खूपच रोमँटिक होतं. आम्ही जमिनीवर चंद्राची वाट पाहत बसलो होतो, पण निकने चक्क मला ढगांच्या वर नेलं आणि तिथे आम्ही आमचा करवा चौथचा उपवास सोडला. ही आठवण मी कधीच विसरू शकत नाही."

कपिल शर्माच्या शोमध्ये प्रियांकाने केवळ हाच नाही, तर निकसोबतच्या संसारातील अनेक मजेशीर किस्से सांगितले. सध्या प्रियांका तिच्या आगामी हॉलिवूड प्रोजेक्ट्समध्ये व्यस्त आहे, पण भारताप्रती आणि इथल्या सणांप्रती तिचं प्रेम पाहून चाहते पुन्हा एकदा तिच्या प्रेमात पडले आहेत. निक जोनसने ज्या पद्धतीने भारतीय सणांचा आदर केला आहे, त्याचंही कौतुक होत आहे.