शाहरुखचे ब्लॉकबस्टर 'देवदास' ते 'चेन्नई एक्सप्रेस' पुन्हा थिएटरमध्ये,'ही' तारीख आताच लिहून ठेवा

बॉलिवूडचा किंग अर्थात शाहरुख खान 2 नोव्हेंबरला आपला वाढदिवस एक खास पद्धतीने साजरा करणार आहे. शाहरुखने आपल्या वाढदिवशी खास फिल्म फेस्टिव्हलचे आयोजन केले आहे.

शाहरुख खानच्या वाढदिवसानिमित्त पार पडणारा फिल्म फेस्टिव्हल 13 ऑक्टोबर 2025 पासून सुरू होणार असून पुढील दोन आठवडे चालेल. यामध्ये 30+ शहरांतील 75+ सिनेमागृहांमध्ये शाहरुख खानचे आतापर्यंतचे सर्वात लोकप्रिय ब्लॉकबस्टर चित्रपट पुन्हा एकदा मोठ्या पडद्यावर दाखवण्यात येणार आहेत.

शाहरुख खानच्या सिनेमॅटिक प्रवासाचा पुन्हा एकदा आनंद घेण्याची एक सुवर्णसंधी प्रेक्षकांना या फिल्म फेस्टिव्हलच्या माध्यमातून पु्न्हा एकदा मिळणार आहे.

शाहरुख खान फिल्म फेस्टिव्हलबाबत बोलताना म्हणाला,"सिनेमा हे नेहमीच माझं घर राहिलं आहे आणि या चित्रपटांना पुन्हा एकदा रुपेरी पडद्यावर पाहणं हे खूप कमाल आहे. हे चित्रपट फक्त माझे नसून प्रेक्षकांचेही आहेत. कारण गेल्या 33 वर्षांपासून प्रेक्षक माझ्यावर भरभरून प्रेम करत आहे. मी आशा करतो की हे चित्रपट पाहण्यासाठी येणारे प्रेक्षक पुन्हा एकदा अॅक्शन आणि रोमान्ससह सिनेमाची जादू अनुभवतील".

शाहरुख खानच्या वाढदिवसानिमित्त पार पडणाऱ्या फिल्म फेस्टिव्हलमध्ये 'चेन्नई एक्सप्रेस', 'देवदास', 'दिल से', 'जवान', 'कभी हां कभी ना', 'मैं हूं ना', 'ओम शांति ओम'सह अनेक वेगवेगळ्या जॉनरच्या चित्रपटांचा आस्वाद चाहत्यांना घेता येणार आहे.

शाहरुख खानचा आगामी 'किंग' हा चित्रपट 2026 मध्ये प्रदर्शित होणार आहे. या चित्रपटात शाहरुखसह दीपिका पदुकोण, अभिषेक बच्चन आणि सुहाना खान यांचाही समावेश आहे.

'किंग' या बहुप्रतीक्षित चित्रपटानंतर किंग खान पुन्हा एकदा काहीतरी धमाकेदार घेऊन येणार आहे. या चित्रपटाची चाहत्यांमध्ये प्रचंड उत्सुकता आहे.