सूरज चव्हणच्या लग्नात 'किलर गर्ल' जान्हवीला राग अनावर, भर मंडपातच पाहुण्यांनाच सुनावलं, म्हणाली...

सूरज चव्हाण 20 नोव्हेंबर 2025 रोजी पुण्यातील सासवड याठिकाणी विवाहबंधनात अडकला आहे. मोठ्या थाटात सूरज आणि संजना यांचा लग्नसोहळा पार पडला. मात्र सूरजच्या लग्नात लक्ष वेधून घेतलं ती त्याची बहिण जान्हवी किल्लेकरने.

सूरज चव्हाणच्या लग्नात जान्हवी किल्लेकर संतापलेली होती. भर मंडपातच आलेल्या पाहुण्यांना सुनावताना 'किलर गर्ल' दिसून आली. पाहुण्यांच्या वागणुकीमुळे जान्हवीला राग अनावर झाला होता.

जान्हवी किल्लेकरला राग अनावर झाल्याने तिने स्टेजवर जात माईक हातात घेतला आणि आलेल्या पाहुण्यांना विनंती वजा सुनावत म्हणाली,"अरे आपण लग्नाला आलोय. सूरजचं लग्न तर लागुदेत. त्याचं लग्न लागू नये, असं वाटतंय का तुम्हाला? तो आतमध्ये वैतागुन बसलाय. कृपया थोडं सहकार्य करा".

जान्हवी किल्लेकर पुढे म्हणाली,"मी हात जोडून नमस्कार करते. कृपया ऐका. खरंच सगळ्यांची डोकी आता फिरली आहेत. विनंती करते तुम्हाला. कृपया आता सूरजला बाहेर येऊ द्या. कोणी काही करू नका. सूरजवर तुम्ही खूप प्रेम करता. त्याच्या लग्नासाठी तुम्ही सगळे एवढ्या मोठ्या संख्येने इथे आले आहेत".

जान्हवीने सुनावल्यानंतर उपस्थित मंडळींनी तिला थोडं सहकार्य केलं. त्यामुळे जान्हवीने उपस्थित मंडळींचे जाहिररित्या आभार मानले. पुढे कशी दिसते मी? असंही विचारताना जान्हवी दिसून आली.

सूरज चव्हाणच्या लग्नात जान्हवी किल्लेकर हळदी समारंभापासून सहभागी झाली होती. करवली म्हणून ती मिरवत होती. लग्नातील तिच्या सर्व लूकची चांगलीच चर्चा झाली.

सूरजच्या लग्नात जान्हवी किल्लेकरने सर्वांना थक्क केलं. तिच्यासोबत फोटो काढण्यासाठी चाहत्यांनी गर्दी केली होती. सूरज चव्हाणचं लग्न ओपन टू ऑल झालं आणि त्यामुळे मोठ्या प्रमाणात चेंगराचेंगरी झाली.