Akshaye Khanna: Dhurandhar पाहिला? आता पाहा अक्षय खन्नाच्या मस्ट वॉच फिल्म्स, सस्पेन्स-थ्रिलरचं परफेक्ट कॉम्बिनेशन

अभिनेता अक्षय खन्ना हा हिंदी चित्रपटसृष्टीतील सर्वात प्रतिभावान आणि अनेकदा दुर्लक्षित राहिलेल्या कलाकारांपैकी एक आहे. त्याच्या अभिनयातील खोली, त्याचं प्रत्येक पात्रातील समर्पण आणि प्रामाणिकपणा नेहमीच त्याला मिळालेल्या प्रसिद्धीपेक्षा अधिक प्रभावी ठरला आहे.

१९९७ मध्ये 'हिमालय पुत्र' मधून पदार्पण केल्यानंतर, त्याने अनेक गाजलेल्या भूमिका साकारल्या. आदित्य धर यांच्या 'धुरंधर' मध्ये त्याने पुन्हा एकदा आपल्या अभिनयाची चुणूक दाखवत प्रेक्षकांची मने जिंकली आहेत. IMDb वरील रेटिंगनुसार अक्षय खन्नाच्या ५ सर्वाधिक गाजलेल्या आणि प्रभावी भूमिका कोणत्या, जाणून घेऊया.

१. बॉर्डर (Border) - १९९७ : जे.पी. दत्ता यांचा हा चित्रपट १९७१ च्या भारत-पाकिस्तान युद्धावर आधारित असलेला एक ऐतिहासिक ॲक्शन ड्रामा आहे. या चित्रपटाने अक्षय खन्नाला घराघरांत पोहोचवले. ही कथा एका छोट्या भारतीय सैनिकांच्या तुकडीची आहे, जी लोंगेवाला पोस्टचे धैर्याने संरक्षण करते.

मोठ्या संख्येने पाकिस्तानी सैनिकांचा हल्ला परतवून लावत, मदत येईपर्यंत त्यांनी आपले स्थान कसे टिकवले, हे यात दाखवले आहे. अक्षय खन्नाने यात सेकंड लेफ्टनंट धरमवीर सिंह या तरुण, आदर्शवादी आणि अत्यंत धाडसी अधिकाऱ्याची भूमिका साकारली. हा चित्रपट Amazon Prime Video वर उपलब्ध आहे.

२. दिल चाहता है (Dil Chahta Hai) - २००१ : हा चित्रपट फरहान अख्तर दिग्दर्शित एक महत्त्वपूर्ण 'कमिंग-ऑफ-एज' कॉमेडी ड्रामा आहे. तीन कॉलेजमधील मित्रांच्या (आकाश, समीर आणि सिद्धार्थ) आणि त्यांच्या बदलत्या नातेसंबंधांची कथा यात आहे.

अक्षय खन्नाने यात सिद्धार्थ या शांत, कलात्मक आणि संवेदनशील मित्राची भूमिका साकारली होती. तिघांच्या मैत्रीत बदल होतो, जेव्हा त्यापैकी एकाला एका वयस्कर महिलेवर प्रेम होते. या चित्रपटाने मैत्री, प्रेम आणि आयुष्य यावर एक नवा दृष्टिकोन दिला. हा चित्रपट Amazon Prime Video वर पाहता येईल.

३. दृश्यम २ (Drishyam 2) - २०२२ : २०१५ मध्ये आलेल्या 'दृश्यम' च्या घटनेनंतर काही वर्षांनी सुरू होणारा हा क्राईम मिस्ट्री थ्रिलर आहे. एका मिसिंग झालेल्या मुलाचा केस पोलीस पुन्हा उघडतात. आपल्या कुटुंबाला वाचवण्यासाठी विजय साळगावकर (अजय देवगण) मार्ग शोधत असताना, वरिष्ठ पोलीस अधिकारी आयजी तरुण अहलावत याच्या रुपात अक्षय खन्नाची एन्ट्री होते.

हा अधिकारी अतिशय हुशार आणि कठोर असतो, जो सत्य बाहेर काढण्यासाठी प्रत्येक लहान तपशीलाची तपासणी करतो. हा चित्रपट Disney+ Hotstar वर उपलब्ध आहे.

४. सेक्शन ३७५ (Section 375) - २०१९ : हा एक अत्यंत गंभीर आणि जबरदस्त लीगल ड्रामा आहे, जो लैंगिक अत्याचाराच्या प्रकरणांभोवती फिरतो. अक्षय खन्नाने यात अश्विन गायकवाड या उच्च श्रेणीच्या वकिलाची भूमिका साकारली आहे.

तो एका प्रसिद्ध चित्रपट दिग्दर्शकाचा बचाव करण्यासाठी केस लढतो, ज्याच्यावर त्याच्या कॉस्च्युम डिझायनरने लैंगिक अत्याचाराचा आरोप केला आहे. विरोधाभास असा की, त्याची माजी शिष्य (रिचा चढ्ढा) ही त्याच्या विरोधात केस लढत असते. हा चित्रपट Amazon Prime Video वर पाहता येईल.

५. 'छावा' (Chhaava) - २०२५ : विकी कौशलसोबतच्या 'छावा' या ऐतिहासिक चित्रपटामध्ये अक्षय खन्नाने मुघल सम्राट औरंगजेब याची भूमिका साकारली आहे, जी त्याच्या करिअरमधील एक महत्त्वपूर्ण टप्पा ठरली आहे. औरंगजेबाच्या भूमिकेचे चित्रण नेहमीच पडद्यावर खूप आवाज चढवून किंवा नाटकीय केले जाते, पण अक्षयने या भूमिकेसाठी एक वेगळा मार्ग निवडला. त्याने अतिशय संयमित पण तितकाच तीव्र अभिनय केला आहे.

विकी कौशलसारख्या ताकदवान अभिनेत्यासमोर उभे असतानाही, अक्षयचा शांत दरारा आणि कमी संवाद हेच त्याचे सर्वात मोठे हत्यार ठरले. त्याचे प्रत्येक हावभाव, पॉज आणि लहानशी हालचाल सुद्धा त्याची क्रूरता दर्शवते. तो फ्रेममध्ये असूनही, कोणालाही न दाबता, शांतपणे त्या फ्रेमवर कब्जा करतो. त्याचा हा अभिनय खरोखरच जबरदस्त आहे.

६. 'ताल' (Taal) : सुभाष घई दिग्दर्शित 'ताल' हा चित्रपट आजही त्याच्या उत्कृष्ट संगीत आणि प्रभावी सीन्ससाठी खूप पसंत केला जातो. या चित्रपटात अक्षय खन्नाने मानव नावाच्या एका उत्कट आणि भावनात्मक संगीतकाराची भूमिका साकारली आहे.

ऐश्वर्या रायसोबतची त्याची ऑन-स्क्रीन केमिस्ट्री, त्याचे अर्थपूर्ण हावभाव आणि पडद्यावरचे त्याचे आकर्षक अस्तित्व यामुळे 'ताल' अनेक वर्षे चाहत्यांच्या मनात घर करून राहिला. कमर्शिअल आणि अभिनयाला महत्त्व असलेल्या अशा दोन्ही प्रकारच्या भूमिकांमध्ये अक्षय खन्ना किती प्रभावीपणे चमकू शकतो, याचा 'ताल' हा उत्तम पुरावा आहे.

७. धुरंधर (Dhurandhar) - २०२५ : आदित्य धर दिग्दर्शित हा चित्रपट नुकताच रिलीज झालेला स्पाय ॲक्शन थ्रिलर आहे. यात एका गुप्त भारतीय इंटेलिजन्स मिशनची कथा आहे. या मिशन अंतर्गत जस्किरत सिंह (रणवीर सिंह) ला 'हमजा अली माझारी' या नावाने पाकिस्तानच्या कराचीतील गुन्हेगारी नेटवर्कमध्ये गुप्तचर म्हणून पाठवले जाते.

अक्षय खन्नाने या चित्रपटात मुख्य खलनायक रहमान डकैत साकारला आहे. अक्षयच्या क्रूर आणि संयमित अभिनयामुळे ही भूमिका खूप गाजली आहे. हा चित्रपट सध्या थिएटरमध्ये धुमाकूळ घालत असून, तो लवकरच OTT वर उपलब्ध होईल.