'आम्ही जन्माला येतो, मग आमचं शोषण होतं', प्रसिद्ध अभिनेत्रीसोबत बालपणी घडलेलं भयंकर, सांगितला तो घाणेरडा प्रसंग

सिनेमाच्या पडद्यावर आपल्या अभिनयाने राष्ट्रीय पुरस्कार पटकावणारी आणि वास्तवात अत्यंत निर्भीडपणे आपली मतं मांडणारी अभिनेत्री पार्वती थिरुवोथू सध्या एका खळबळजनक खुलाशामुळे चर्चेत आली आहे.

'टेक ऑफ' आणि 'करीब करीब सिंगल' सारख्या चित्रपटांतून आपल्या अभिनयाची चुणूक दाखवणारी ही अभिनेत्री खऱ्या आयुष्यातही तितकीच कणखर आहे. मात्र, या कणखरतेच्या मागे बालपणातील काही अशा जखमा आहेत, ज्या आजही तिला वेदना देतात.

नुकत्याच दिलेल्या एका मुलाखतीत तिने लहानपणी झालेल्या लैंगिक शोषणाबद्दल आणि पुरुषांच्या विकृत मानसिकतेबद्दल मनमोकळा संवाद साधला आहे.

'The Male Feminist' या पॉडकास्टमध्ये बोलताना पार्वतीने आपल्या लहानपणीच्या त्या सुन्न करणाऱ्या आठवणींना उजाळा दिला. ती म्हणाली, "आम्ही जन्माला येतो आणि लगेचच आमचं शोषण सुरू होतं. मला आजही आठवतंय, मी खूप लहान होते. कधी ऑटोमध्ये चढताना कोणीतरी चिमटा काढायचा, तर कधी रेल्वे स्टेशनवर आई-बाबांसोबत चालत असताना अचानक कोणीतरी छातीवर मारून जायचं. तो स्पर्श नव्हता, तर तो एखाद्या थप्पडसारखा प्रहार होता. एका लहान मुलीसाठी तो शारीरिक आणि मानसिक धक्का खूप मोठा होता."

या धक्कादायक अनुभवांमुळे पार्वतीच्या आईला तिला जगाशी लढण्यासाठी वेगळ्या पद्धतीने तयार करावं लागलं. पार्वती सांगते, "माझी आई मला रस्त्यावरून कसं चालावं, याचे धडे द्यायची. ती सांगायची की, विंडो शॉपिंग करत थांबू नकोस, चालताना पुरुषांच्या हातांकडे लक्ष ठेव की त्यांचे हात कुठे शिवशिवतायत. एका आईला आपल्या चिमुकल्या मुलीला हे सगळं शिकवावं लागणं, हे आपल्या समाजाचं किती मोठं अपयश आहे?"

इतकंच नाही, तर रस्त्यावरून चालताना अनेकदा पुरुषांनी स्वतःचे कपडे वर करून अश्लील अंगप्रदर्शन केल्याच्या घटनाही तिने सांगितल्या. तेव्हा या गोष्टींचा अर्थ कळत नव्हता, पण आज मागे वळून पाहताना त्या अनुभवांनी शरीरावर आणि मनावर किती खोल परिणाम केलेत, याची जाणीव होते, असंही ती म्हणाली.

पार्वती केवळ एक उत्तम अभिनेत्री नाही, तर ती जेंडर इक्वॅलिटी, महिलांची सुरक्षा आणि कन्सेन्ट यांसारख्या मुद्द्यांवर नेहमीच आवाज उठवत आली आहे. 'चार्ली', 'बेंगलोर डेज' आणि 'मरयान' सारख्या सुपरहिट चित्रपटांनंतरही तिने आपली साधी राहणी आणि स्पष्टवक्तेपणा जपला आहे. दाक्षिणात्य चित्रपटसृष्टीतील 'वुमेन इन सिनेमा कलेक्टिव्ह' (WCC) च्या स्थापनेतही तिचा मोठा वाटा आहे.