'हा असा आजार...', रुटीन चेकअपला गेली अन् कॅन्सरने गाठलं! बॉलिवूड अभिनेत्रीच्या आयुष्यात आलेलं भयंकर वादळ

मुंबई: गेल्या काही दिवसांमध्ये अनेक अभिनेत्रींनी कॅन्सरशी यशस्वी लढा दिला आहे. हिना खान, दीपिका कक्कर, मनीषा कोईराला, सोनाली बेंद्रे, किरण खेर अशा कित्येक अभिनेत्री कॅन्सरशी लढा दिल्यानंतरही त्यांच्या चाहत्यांचं मनोरंजन करत आहेत. अशातच २०००चं दशक गाजवलेल्या अभिनेत्रीने तिचा कॅन्सरमधून बरं होण्याचा प्रवास अगदी मोकळेपणाने चाहत्यांसमोर मांडला आहे.

बॉलिवूडची प्रसिद्ध अभिनेत्री महिमा चौधरीने काही वर्षांपूर्वी ब्रेस्ट कॅन्सरशी यशस्वीपणे लढा दिला आहे. २०१९ मध्ये कॅन्सरचे निदान झाल्यानंतर तिने २०२२ मध्ये हा अनुभव सार्वजनिकरित्या सांगितला. अलीकडेच तिने एका मुलाखतीत आपल्या निदानाबद्दल एक महत्त्वाची गोष्ट उघड केली आहे, जी प्रत्येक महिलेसाठी धोक्याची घंटा ठरू शकते.

५२ वर्षीय महिमा चौधरीला कॅन्सर असल्याचा अगदी साधा संशयही आला नव्हता. महिमाने खुलासा केला, "माझ्या शरीरात कॅन्सरचे एकही लक्षण नव्हते. मी ब्रेस्ट कॅन्सरची खास तपासणी करायला गेले नव्हते. मी फक्त माझ्या रुटीन चेकअपसाठी डॉक्टरांकडे गेले होते."

तिला अजिबात कल्पना नव्हती की तिला ब्रेस्ट कॅन्सर आहे. तिने सांगितले की, कॅन्सर हा असा आजार आहे, जो तुम्ही स्वतः लवकर ओळखू शकत नाही. तो केवळ चाचण्यांमधूनच समजू शकतो. या अनुभवानंतर महिमा चौधरीने भारतातील सर्व महिलांना एक कळकळीचे आवाहन केले आहे.

"माझे सर्व महिलांना हेच सांगणे आहे की, तुम्ही तुमच्या रुटीन टेस्ट्स वेळेवर करा. तुम्ही असे केल्यास, कॅन्सरचे निदान लवकर होऊ शकते आणि लवकर उपचार सुरू झाल्यास लढणे सोपे होते," असे ती म्हणाल्या.

महिमा चौधरीने तिच्या निदानानंतर भारतातील कॅन्सर उपचारांमध्ये झालेल्या सकारात्मक बदलांचीही जाणीव झाली. ती म्हणाल्या, "माझे निदान झाल्यानंतर ३-४ वर्षांत भारतात कॅन्सरच्या उपचारांमध्ये खूप मोठा बदल झाला आहे. अनेक जेनेरिक औषधे आता स्वस्त झाली आहेत. औषध कंपन्यांकडून चांगला आधार मिळतोय."

कॅन्सरबद्दल जागरूकता वाढली आहे आणि इतर लोक जे याच्याशी लढत आहेत, त्यांच्या कथांमधून मला खूप प्रेरणा मिळते, असेही तिने सांगितले. नियमित तपासणीमुळे आपला जीव वाचला, हे महिमा चौधरीने स्पष्ट केले आहे.