Dombivli: डोंबिवलीमध्ये रस्ते का झाले गुलाबी? धक्कादायक कारण समोर, घटनास्थळावरचे PHOTOS

सांस्कृतिक नगरी म्हणून ओळख असलेल्या डोंबिवलीमध्ये एकीकडे रस्ते आणि पाण्याच्या समस्यांमुळे नागरिक पुरते हैराण आहे. तर दुसरीकडे नागरी वस्तीच्या बाजूला वसलेल्या एमआयडीसीमधून रासायनिक हल्लेच सुरूच आहे. काही वर्षांपासून डोंबिवलीमध्ये हिरवा पाऊस पडला होता, नाले लाल झाले होते. आता पुन्हा एकदा रस्ते गुलाबी झाल्याचं समोर आलं आहे. या घटनेमुळे डोंबिवलीमध्ये घबराट पसरली आहे.

हिरवा पाऊस, लाल पाणी असेल किंवा गाडीवर काळे ठिपके पडले असेल, यानंतर आता डोंबिवलीमध्ये गुलाबी रस्ते झाल्याचा प्रकार समोर आला आहे. डोंबिवलीच्या एमआयडीसी फेज २ मध्ये हा प्रकार घडला आहे.

डोंबिवली एमआयडीसी परिसरात मोठ्या प्रमाणात रासायनिक कंपन्या आहेत. या कंपन्यांमधून निघणाऱ्या केमिकल्समुळे परिसरातील हवा, पाणी आणि पर्यावरणावर नेहमीच परिणाम होत असल्याची तक्रार नागरिकांकडून केली जातेय.

डोंबिवलीतील एमआयडीसी फेज 2 मध्ये हा प्रकार सकाळी समोर आला. जवळपास संपूर्ण रस्ता हा गुलाबी झाला होता. गुलाबी रस्ता झाल्यामुळे केमिकल कंपन्यांनी रस्त्यावर पाणी मारून साफ करण्याचा प्रयत्न केला. पण, रंग कायम राहिला.

विशेष म्हणजे, डोंबिवली एमआयडीसी परिसराला लागूनच नागरी वस्ती आहे. इथं दर महिना दोन महिन्यात केमिकल कंपन्यांकडून असे प्रकार सर्रास घडत आहे, असा आरोप इथल्या स्थानिक नागरिकांनी केला आहे.

एमआयडीसीचा प्रश्न हा मागील अनेक वर्षांपासून सुरू आहे. डोंबिवलीमध्ये दर दोन महिन्यानंतर असे प्रकार घडत आहे. या प्रकारावर आळा घालण्यासाठी प्रशासनाकडून कोणतेही पाऊल उचलले जात नाही.

डोंबिवली एमआयडीसीमध्ये केमिकल कंपन्या आहे. त्यांच्याकडून हे प्रकार घडत आहे. त्यामुळे या धोकादायक कंपन्या डोंबिवलीमधून हलवल्या पाहिजे, अशी मागणी स्थानिकांनी केली आहे,

प्रत्येकवेळी अशा घटना घडतात आणि प्रशासनाकडून कारवाईचं आश्वासन दिलं जातं. त्यानंतर केमिकल कंपन्याकडून काही दिवस काम थांबवलं जातं पण पुन्हा सगळं प्रकरण थंड झाल्यानंतर असे प्रकार परत समोर येत आहे.

धक्कादायक म्हणजे, याच एमआयडीसीमध्ये काही वर्षांपासून स्फोट, अपघात आणि गाड्यांवर काळे ठिपले पडल्याच्या घटना घडल्या आहेत. पण, कारवाई मात्र काहीच झाली नाही.

त्यामुळे डोंबिवलीतलं प्रदूषण विषारी करणाऱ्या कंपन्यांना अंबरनाथ इथं हलवण्यात याव्यात अशी मागणी डोंबिवलीकरांनी केली आहे.