सुंदर त्वचेसाठी वापरताय प्रॉडक्ट्स? तर 'ही' चूक करू नका, नाहीतर फायद्याऐवजी होईल मोठं नुकसान!

आपली त्वचा सुंदर, उजळ आणि मृदू ठेवण्यासाठी आपण अनेक प्रकारचे प्रॉडक्ट्स वापरतो. फेसपॅक, क्रीम, सिरम्स यांचा वापर करतो. पण यापैकी काही प्रॉडक्ट्स चुकीच्या वेळेस लावल्यास आपल्या त्वचेला फायदा होण्याऐवजी नुकसान होऊ शकतं, जर योग्य काळजी घेतली नाही, तर त्वचेचा त्रास होऊ शकतो.

ब्युटी एक्स्पर्ट अंबिया अहमद यांचं म्हणणं आहे की, "काही स्किन प्रॉडक्ट्स असे असतात, जे दिवसा वापरल्यास त्वचेला सनबर्न, डाग किंवा अ‍ॅलर्जी होण्याची शक्यता असते." त्यामुळे हे प्रॉडक्ट्स दिवसाच्या वेळेस वापरणं टाळावं.

त्वचा उजळण्यासाठी आणि ब्राइटनेस वाढवण्यासाठी व्हिटॅमिन C सिरम उपयोगी ठरतं. पण हे सिरम जर सकाळी किंवा दुपारी सूर्यप्रकाशात वापरलं गेलं, तर ते त्वचेशी रिअ‍ॅक्ट होऊन सूर्याच्या अतिनील किरणांमुळे त्वचेवर काळे डाग, डागांखालील जळजळ किंवा पुरळसदृश लक्षणं दिसू शकतात. त्यामुळे हे सिरम सकाळी लवकर किंवा संध्याकाळी सूर्यास्तानंतर वापरणं जास्त सुरक्षित ठरतं.

त्याचप्रमाणे अ‍ॅलोवेरा जेल हा त्वचेसाठी लाभदायक मानला जातो. पण गरम हवामानात दिवसा अ‍ॅलोवेरा जेल वापरणं टाळावं. अ‍ॅलोवेरामुळे त्वचा सूर्यप्रकाशाच्या प्रति अधिक संवेदनशील बनते, ज्यामुळे त्वचा कोरडी पडते आणि सनबर्न होण्याची शक्यता वाढते.

ऑलिव्ह ऑईलही त्वचेला पोषण देतं. पण जर ते दिवसा वापरलं, तर सूर्याच्या उष्णतेमुळे त्वचा आणखी तेलकट बनते. चेहऱ्यावर तेल जमा होतं आणि त्यामुळे रॅशेस, अ‍ॅलर्जी किंवा त्वचा खाजवण्याची तक्रार होऊ शकते. त्यामुळे ऑलिव्ह ऑईल रात्री झोपताना लावणं जास्त फायदेशीर ठरतं.

उन्हाळ्यात त्वचेची योग्य काळजी घेणं गरजेचं असतं. दिवसा कोणते प्रॉडक्ट्स वापरायचे आणि कोणते टाळायचे, याबद्दल जागरूक राहणं आवश्यक आहे. अन्यथा त्वचेला कायमस्वरूपी त्रासदायक परिणाम भोगावे लागू शकतात. त्यामुळे दिवसा हे प्रॉडक्ट्स वापरणं टाळा आणि रात्रीच वापरा, त्वचेसाठी हेच जास्त सुरक्षित आहे.