Underwear : एकदा घातल्यानंतर अंडरवेअर कधी धुवायची? डॉक्टरांनी सांगितली योग्य वेळ

निरोगी राहण्यासाठी स्वच्छता राखणं खूप महत्त्वाचं आहे. तुम्ही शौचालय, स्वयंपाकघर आणि घराच्या प्रत्येक कोपऱ्याच्या स्वच्छतेची काळजी घेता. त्याचप्रमाणे तुमचं शरीर, कपडे, चादरी, टॉवेल, अगदी ब्रश आणि अंतर्वस्त्रांची स्वच्छता राखणं खूप महत्त्वाचं आहे जेणेकरून तुम्ही निरोगी राहाल. डॉ. मनन व्होरा यांनी इन्स्टाग्रामवरील एका पोस्टमध्ये  दररोज वापरल्या जाणाऱ्या वस्तू स्वच्छ करण्यावर एक पोस्ट शेअर केली आहे.

उशांचे कव्हर दर 3-4 दिवसांनी स्वच्छ करावे, विशेषतः जर तुमची त्वचा तेलकट आणि मुरुमे असतील तर.  तुम्ही ज्या उशीवर झोपता ती देखील लोक वर्षानुवर्षे वापरतात. तुम्ही उशी बदलली पाहिजे किंवा दर 6 महिन्यांनी स्वच्छ केली पाहिजे.

बेडशीट आठवड्यातून एकदा धुणं महत्त्वाचं आहे कारण तुम्ही दररोज त्यावर झोपता.  अंगावर घ्यायचं ब्लँकेट 2 ते 3 महिन्यांपेक्षा जास्त काळ वापरू नका. त्यात धूळ, घाण आणि शरीरातील तेल साचते. ते बॅक्टेरिया आणि संसर्गाचे घर बनू शकते.

टॉवेल ही देखील अशीच एक वस्तू आहे, जी आपण सर्वजण दररोज अनेक वेळा वापरतो. काही लोक ते बाथरूममध्ये ओले टांगतात. त्यात दुर्गंधी आणि बॅक्टेरिया वाढू शकतात. दोन ते तीन वापरानंतर टॉवेल नेहमी चांगलं धुवावा.

काही लोक 6 महिने ते एक वर्ष टूथब्रश वापरतात, पण हेदेखील अस्वच्छ आहे. यामुळे तुमचं आरोग्य बिघडू शकतं. तसंच दात व्यवस्थित स्वच्छ होणार नाहीत. दर तीन महिन्यांनी टूथब्रश बदलणं चांगलं, विशेषतः जेव्हा ब्रिसल्स खराब होतात.

प्रत्येकजण दररोज जीन्स घालतो. हा असा पोशाख आहे जो लोक बरेच दिवस घालतात आणि तो लवकर घाणेरडा दिसत नाही म्हणून तो स्वच्छ करत नाहीत. पण दर 4-5 वेळा घालल्यानंतर जीन्स स्वच्छ करावी, विशेषतः जेव्हा त्यातून दुर्गंधी येऊ लागते.

आता अंडरवेअर... ती जेव्हा जेव्हा घालता त्यानंतर लगेच धुवा. कोणतंही कारण देऊ नका. जर तुम्ही न धुता वारंवार घाणेरडे अंडरवेअर घातले तर संसर्ग होऊ शकतो. तुम्ही आजारी पडू शकता, असं डॉ. व्होरा म्हणाले.