10 मिनिटांत बनवा क्रिस्पी व्हेज ड्राय मंच्युरियन, घरच्या घरी ट्राय करा 'ही' पद्धत PHOTOS

मंच्युरियन हा सर्वांचा आवडता पदार्थ आहे. गाडीवर मिळणारे मंच्युरियन त्यातही ड्राय मंच्युरियन खाणे अनेकांना खूप आवडतं. मात्र, आता हे मंच्युरियन खाण्यासाठी बाहेर जाण्याची गरज नाही, कारण तुम्ही घरच्या घरी अगदी 10 मिनिटांत हे मंच्युरियन बनवू शकता. याचीच रेसिपी<a href="https://news18marathi.com/maharashtra/wardha/"> वर्ध्यातील</a> गृहिणी शोभाताई मकेश्वर यांनी सांगितली आहे.

मंच्युरियन बनवण्यासाठी साहित्य : खिसलेली पत्ता कोबी, बारीक चिरलेली शिमला मिरची, रंग येण्यासाठी खिसलेला बीट अगदी थोडा, 2 चमचे सोया सॉस, तिखट, मीठ, हळद, आलं लसूण पेस्ट, दीड वाटी मिक्सरमधून बारीक केलेले पोहे, इथे तुम्ही तांदळाचे पीठ आणि मैदा तसेच कणिक देखील अ‍ॅड करू शकता.

मंच्युरियन बनवण्यासाठी कृती : सर्वप्रथम एका मोठ्या बाऊलमध्ये खिसलेली पत्ताकोबी घ्यायची आहे. तुम्ही बारीक चिरून देखील घेऊ शकता आणि त्यात रंग येण्यासाठी बारीक खिसून घेतलेला अगदी थोडसं बीट घाला. तसेच बारीक चिरून घेतलेली शिमला मिरची आणि तुम्ही गाजर देखील या ठिकाणी अ‍ॅड करू शकता. आता सोया सॉस अ‍ॅड करा. अंदाजे 2 चमचे, आता आपण घेतलेले सर्व मसाले ज्यात तिखट, मीठ, हळद आणि आलं लसूण पेस्ट अ‍ॅड करून घ्यायचं आहे.

आता हे सर्व मसाले आपल्याला एकत्र करायचे आहेत आणि यात बारीक केलेले पोहे सुद्धा आपण अ‍ॅड करा. आता हे सर्व मिश्रण चांगलं एकत्र करून घ्यायचं आहे आणि याचा गोळा बनेल इतपत ते भिजवून घ्यायचा आहे. गरज असल्यास तुम्ही या ठिकाणी मैदा तांदळाचे पीठ आणि कणकीचा देखील वापर करू शकता. कोरडं होत असेल तर तुम्ही थोडासे त्यात पाणी देखील अ‍ॅड करू शकता.

आता हे सगळे मंच्युरियन आपल्याला कढईत गरम तेलात तळून घ्यायचे आहेत. कमी आचेवरच हे तळून घ्यायचे आहेत. कारण ते आपल्याला आतून चांगले खुसखुशीत पाहिजे आहेत. तुम्ही हे तळताना डायरेक्ट तेलात अ‍ॅड करू शकता किंवा गोळे बनवून देखील हे गोळे तेलात अ‍ॅड करू शकता.

छान डीप फ्राय करून घेतल्यानंतर सोनेरी लालसर रंग आला की हे मंच्युरियन खाण्यासाठी तयार आहेत. तुम्ही सॉस किंवा आपल्या आवडत्या चटणी बरोबर ही मंच्युरियन खाऊ शकता. आतून अतिशय कुरकुरीत आणि क्रिस्पी टेस्टी असे हे मंच्युरियन कोणालाही आवडतील आणि अगदी 10 ते 15 मिनिटांत हे मंच्युरियन बनवून तयार होतील असे आहेत. त्यामुळे एकदा तरी हे मंच्युरियन नक्की ट्राय करा.