तुमच्या मुलालाही मोबाईलचं व्यसन लागलंय? फाॅलो करा 'या' 6 सोप्या टिप्स, मुलांचं आरोग्य अन् भविष्य राहील सुरक्षित!

आजकाल मुले खेळण्यापेक्षा जास्त वेळ मोबाईलवर घालवत आहेत. मग तो गेम खेळणे असो, व्हिडिओ पाहणे असो किंवा सोशल मीडिया स्क्रोल करणे असो, मोबाईलच्या व्यसनामुळे (mobile addiction) त्यांच्या दैनंदिन दिनचर्येवर आणि आरोग्यावर नकारात्मक परिणाम होत आहे. यामुळे त्यांची झोप, एकाग्रता आणि शारीरिक क्षमता बिघडत आहे.

पालकांनी हे समजून घेणे महत्त्वाचे आहे की, मुलांना मोबाईलपासून पूर्णपणे दूर करणे कठीण असले तरी, काही टिप्सच्या मदतीने त्यांचा स्क्रीन टाइम मर्यादित करता येतो.

वापरासाठी वेळ निश्चित करा (Time-Table) : मोबाईल वापरण्याची एक वेळमर्यादा ठरवा. जसे की, शाळेनंतर किंवा दिवसातून फक्त एक तास मोबाईल वापरण्याची परवानगी द्या. यामुळे मुलांना मर्यादेत राहण्यास मदत होईल आणि त्यांना शिस्त लागेल.

मुलांना मैदानी खेळांसाठी प्रोत्साहित करा : मोबाईल वापरण्याऐवजी, त्यांना क्रिकेट, फुटबॉल किंवा सायकलिंगसारख्या मैदानी खेळांसाठी (outdoor games) प्रोत्साहित करा. यामुळे त्यांचे लक्ष मोबाईलवरून हटेल आणि त्यांची शारीरिक क्षमता सुधारेल.

मोबाईलला बक्षीस बनवा : मुलांनी त्यांचे गृहपाठ (homework) किंवा इतर कामे व्यवस्थित केल्यास, त्यांना फक्त तेव्हाच मोबाईल वापरण्याची परवानगी द्या. यामुळे मोबाईल त्यांच्यासाठी व्यसन न राहता, एक बक्षीस बनेल आणि काम पूर्ण करण्याची सवय लागेल.

फॅमिली टाइमला प्राधान्य द्या : रोज काही वेळ कुटुंबासोबत खेळण्यात, बोलण्यात किंवा इतर क्रियाकलापांमध्ये घालवा. जेव्हा मुले घरात व्यस्त राहतील, तेव्हा त्यांना मोबाईलची गरज कमी वाटेल. यामुळे कुटुंबातील संबंधही अधिक मजबूत होतील.

स्क्रीन टाइमचे तोटे समजावून सांगा : मुलांना सोप्या भाषेत सांगा की, जास्त मोबाईल वापरल्याने डोळे कमकुवत होतात, झोप बिघडते आणि मेंदूवर परिणाम होतो. जेव्हा त्यांना कारणे स्वतःहून समजतील, तेव्हा ते मोबाईलचा वापर कमी करतील.

स्वतः एक आदर्श बना (Role Model ) : जर पालक सतत मोबाईलमध्ये व्यस्त असतील, तर मुलेही तेच शिकतील. त्यामुळे, मुलांसमोर मोबाईलचा वापर मर्यादित ठेवा आणि त्यांच्यासमोर योग्य उदाहरण (right example) सेट करा. तसेच, मुलांची झोप आणि दिनचर्या योग्य राखण्यासाठी बेडरूममध्ये टीव्ही आणि मोबाईल ठेवणे टाळा.