Nagpur Blast : नागपूरमध्ये भीषण स्फोटात 9 जणांचा मृत्यू, कंपनीबाहेरचे फोटो आले समोर

नागपूरमध्ये एका कंपनीत भीषण स्फोट झाला असून यात ९ लोकांचा मृत्यू झाल्याची प्राथमिक माहिती समोर येत आहे. बाजार गाव इथं असलेल्या सोलर एक्स्प्लोजिव कंपनीत ही दुर्घटना घडली आहे. मृतांचा आकडा वाढण्याची भीती व्यक्त केली जात आहे.

याबाबत मिळालेली माहिती अशी की, बाजारगाव इथं सोलर एक्सप्लोसिव कंपनी आहे. या कंपनीत भीषण स्फोट झाला. या स्फोटात ९ जणांचा मृत्यू झाला आहे. कंपनीच्या कास्ट बूस्टर प्लांटमध्ये हा स्फोट झाल्याची माहिती समजते.

पॅकिंगवेळी ही दुर्घटना घडली आहे. स्फोट झाल्याची माहिती समजताच कंपनीच्या गेटसमोर मोठी गर्दी झाली आहे. घटनेत मृत्युमुखी पडलेल्यांची किंवा जखमींची नावे समजू शकलेली नाहीत.

रविवारी सकाळी ९ वाजण्याच्या सुमारास दुर्घटना घडल्याची माहिती समजते. स्फोटानंतर घटनास्थळी युद्धपातळीवर बचावकार्य केलं जात आहे.

सोलर एक्सप्लोजिव्ह कंपनी भारतातील अनेक कंपन्यांना दारुगोळा पुरवण्याचं काम करते. संरक्षण क्षेत्राशी संबंधित काही कंपन्यांना दारुगोळ्याची गरज असते.एक्सप्लोजिव्हमध्ये मोठ्या प्रमाणात केमिकल वापरले जाते.