पुणे, बेंगळुरूनंतर देशातलं तिसरं IT पार्क, महाराष्ट्रातल्या या शहरात जागा फायनल, डेडलाईन ठरली!

देशातील बेंगळुरु आणि पुण्यानंतर तिसरं सर्वात मोठं आयटी पार्क लवकरच उभा राहणार आहे. विशेष म्हणजे महाराष्ट्रातील हे दुसरं मोठं आयटी पार्क ठरणार असून याबाबत मुख्यमंत्री देवेंद्र फडणवीस यांनी घोषणा केली होती. यासाठी जागा देखील जवळपास निश्चित झाली असून कामाची डेडलाईनही ठरली आहे.

महाराष्ट्राचे मुख्यमंत्री देवेंद्र फडणवीस यांनी केलेल्या घोषणेनुसार नवे आयटी पार्क उभारण्याच्या हालचाली वाढल्या आहेत. याबाबत आता महत्त्वाचं अपडेट समोर आलं आहे. आयटी पार्कसाठी सोलापुरात जागा जवळपास निश्चित झाली आहे. पुण्यातील जगप्रसिद्ध हिंजवडी आयटी पार्कला पर्याय म्हणून हे नवं आयटी पार्क उभारण्यात येणार आहे.

सीमाभागातील मोठं शहर असणाऱ्या सोलापुरात आयटी पार्क उभारल्याने पुण्याच्या आयटी पार्कवरील ताण कमी होणार आहे. तसेच नोकरीच्या नव्या संधी देखील उपलब्ध होतील. मुख्यमंत्री देवेंद्र फडणवीस यांनी गेल्या तीन महिन्यांपूर्वी सोलापूरचे जिल्हाधिकारी कुमार आशीर्वाद यांना आयटी पार्कसाठी जागा शोधून प्रस्ताव पाठवण्याचे आदेश दिले होते.

याबाबतची कार्यवाही करत सोलापुरातील जलसंपदा विभागाच्या मालकीची 50 एकर जागा जवळपास निश्चित करण्यात आली आहे. ही जागा आयटी पार्कसाठी महाराष्ट्र राज्य औद्योगिक विकास महामंडळाकडे सुपूर्द करण्यात आली आहे. तसेच सुविधांसाठी राज्य सरकारला 38 कोटी रुपयांचा खर्चाचा प्रस्ताव देखील सादर केला आहे.

सोलापुरातील होटगी रोडला बांधण्यात येणाऱ्या 50 मीटर उंचीपर्यंतच्या इमारतीला विमानतळ प्रशासनाकडून परवानगी देखील घेण्यात आली आहे. यामुळे विमानतळावरून निघणाऱ्या विमानाच्या फनेलमध्ये कोणताही अडथळा येणार नाही.

नव्या आयटी पार्कचे काम दीड वर्षामध्ये पूर्ण होणार आहे. तसेच याठिकाणी जवळपास 45 हजार पेक्षा जास्त कर्मचारी काम करू शकतील. आयटी पार्कमधील अंतर्गत रस्ते, पाणी, पथदिवे यासारख्या मूलभूत सुविधांचा विकास करण्यासाठी अंदाजे 38 कोटी पर्यंतचा खर्च अपेक्षित असून त्याचा प्रस्ताव सादर केला आहे.

दरम्यान, पुण्यामधील हिंजवडी येथील आयटी पार्क महाराष्ट्रातील सर्वात मोठा आणि भारतातील दुसऱ्या क्रमांकाचा आयटी पार्क आहे. त्यानतंर सोलापूरच्या आयटी पार्कची उभारणी करण्यात येणार आहे. त्यामुळे रोजगार निर्मिती होणार असून याचा थेट फायदा राज्य आणि देशाच्या अर्थव्यवस्थेला होणार आहे.