जगाला वाचवणार भारताचा उपग्रह! पण कसा? इस्रोचा EOS-08 नेमकं करणार काय?

चंद्रावर चांद्रयान-3 पाठवून जगाला आपली ताकद दाखवणाऱ्या इस्रोने म्हणजेच भारतीय अंतराळ संशोधन संस्थेने आज म्हणजेच 16 ऑगस्ट रोजी नवीन उपग्रह प्रक्षेपित केला. अंतराळात आणखी एक इतिहास रचण्यासाठी भारताने ऐतिहासिक उड्डाण केलं आहे.

500 किलो वाहून नेण्याची क्षमता असलेल्या SSLV-D3 रॉकेटने आंध्र प्रदेशातील श्रीहरिकोटा येथील सतीश धवन अंतराळ केंद्रातून शुक्रवारी सकाळी सुमारे 9.17 वाजता 175.5 किलो वजनाचा सूक्ष्म उपग्रह EOS-08 घेऊन उड्डाण केले.

EOS-08 मिशनच्या प्राथमिक उद्दिष्टांमध्ये सूक्ष्म उपग्रहांची रचना आणि विकास यांचा समावेश आहे. यामध्ये मायक्रो सॅटेलाइट बसशी सुसंगत पेलोड उपकरणे तयार करणे आणि भविष्यातील कार्यरत उपग्रहांसाठी आवश्यक नवीन तंत्रज्ञान समाविष्ट करणे देखील समाविष्ट आहे.

EOS-08 उपग्रहाचे आयुष्य एक वर्ष निश्चित करण्यात आले आहे. त्याचे वस्तुमान अंदाजे 175.5 किलोग्रॅम आहे आणि ते अंदाजे 420 वॅट्स पॉवर निर्माण करते.

इस्रोचे हे मिशन भारतासह संपूर्ण जगासाठी खास आहे. त्याच्या यशामुळे भारताला पृथ्वीच्या हृदयाचे ठोके ऐकायला मिळणार आहेत. त्यामुळे नैसर्गिक आपत्तींची माहिती वेळेत उपलब्ध होणार आहे. या उपग्रहाच्या माध्यमातून भूकंप, त्सुनामी किंवा इतर नैसर्गिक आपत्तींसारख्या पृथ्वीच्या हालचालींची माहिती मिळणार आहे.